Mahir Emrelinin “Nürnberq”də uğursuzluq yaşamasından xəbərdarsız. Həmyerlimiz Almaniyanın 2-ci bundesliqasında çıxış edən komandanın start heyətindəki yerini çoxdan itirib.

Sonuncu dəfə ötən ilin dekabrında - “Darmstadt”la matçda ilk “onbirlik”də yer alan hücumçunun adı ondan sonra keçirilən 8 matçdan üçündə iştirak ərizəsinə salınmayıb, birində əvvəldən axıra qədər ehtiyat oyunçular skamyasında əyləşib. Qalan dörd oyunda isə cəmi 67 dəqiqə meydanda olub.

“Football-plus.az” Almaniyanın tanınmış nəşri “Kicker”ə istinadla xəbər verir ki, Mahirin “Nürnberq” karyerasında yaşadığı eniş göstəricilərinə də təsir edib. Onun təkbətək mübarizələrdən qalib ayrılmaq ehtimalı 40 fazilə dəyərləndirilir. Hava mübarizəsində üstün tərəf kimi yadda qalmaq ehtimalı isə cəmi 27 faizdi. Futbolçunun topla uğurla irəliləmək göstəricisi də zəifləyib – 35 faizə düşüb.

Ümumiyyətlə, Mahir indiyə qədər “Nürnberq”də 1007 dəqiqə forma geyib. O, bu zaman ərzində qapıya 34 zərbədən üçünü qolla tamamlayıb. Deməli, hücumçunun effektivlik ehtimalı cəmi 9 faizdi.

Beləliklə, indi baş məşqçi Miroslav Klozenin ona niyə start heyətində şans vermədiyini daha yaxşı anlamaq olur. Yenə də bu üzdən yalnız Mahiri günahlandıra bilmərik. Necə deyərlər, işlənməyən dəmiri pas tutar. Ümid edək ki, Kloze həmyerlimizə ikinci şansı çox görməyəcək.

KƏNAN BAHADIR