“Təbii ki, belə halın yaşanması ki, xoş deyil” – “İmişli və “Karvan” da Bakıya köç edə bilər
1-ci liqada mövsümü ilk “üçlük”də bitirəcək “Qəbələ”, “İmişli” və “Karvan” növbəti “futbol ili”ndən premyer-liqada çıxış edəcək.
Məlum olduğu kimi, “qırmızı-qaralar” ev oyunlarını Qəbələ şəhər stadionunda keçirəcək. Bəllidi ki, klubun mövcud infrastrukturu bütün tələblərə cavab verir. Lakin qalan bölgə təmsilçiləriylə bağlı mənzərə bulanıqdı. Bu komandaların ev oyunlarının hansı stadionda keçiriləcəyi bəlli deyil. Ona görə ki, nə “İmişli”nin (Heydər Əliyev adına şəhər stadionu), nə də “Karvan”ın (Yevlax şəhər stadionu) 1-ci liqada meydana çıxdığı idman qurğuları premyer-liqa yarışları üçün uyğundu.
Bəs bu komandalarla bağlı durum necə tənzimlənəcək? Növbəti “Araz-Naxçıvan” nümunəsinə şahidlik edəcəyik (Muxtar Respublika təmsilçisi iki mövsümdü ev oyunlarını Bakıda keçirir – red.), yoxsa problemlərin yeni “futbol ili”nin başlayacağı vaxta qədər aradan qaldırılması mümkün olacaq? Ən əsası, PFL klublara bu yöndə lazımi tövsiyələri veribmi?
“Football-plus.az”ın suallarını PFL-in Media və marketinq direktoru Sənan Abdullayev cavabladı:
“Bildiyiniz kimi, İcraiyyə Komitəsinin qərarına əsasən növbəti mövsümdən premyer liqada çıxış edəcək komandalara 1 il möhlət verilməsi nəzərdə tutulub. Komandalar premyer-liqa standartlarına cavab verən istənilən stadionu sifariş edə bilər. Ümumiyyətlə, hər kollektivin özü doğma azarkeşlər qarşısında oynamaqda maraqlı olmalı və bu yöndə cəhd göstərməlidi. Təbii ki, belə halın yaşanması xoş deyil. Amma PFL buna hansısa qadağa qoya bilməz. O ki qaldı tövsiyələrə, Peşəkar Futbol Liqasının az qala bütün əməkdaşları saat fərqi olmadan problemi olan klublarla əlaqə saxlayır. Hansısa klubun rəsmi şəxsi “bizə operativ cavab verilmədi” deyə bilməz”.
KƏNAN BAHADIR
Digər xəbərlər
