“Turan Tovuz” Misli premyer-liqasının 31-ci turu çərçivəsində “Araz-Naxçıvan”ın meydanından bir xalla ayrıldı (1:1). Baxmayaraq ki, “bozqurd” qələbə qazansa, aradakı 5 xal fərqini azalda, avrokuboklara aparan yolu qısalda bilərdi.

Hər halda, Kurban Berdıyevin komandası azarkeşləri üzdü. İş ondadı ki, “Liv Bona Dea Arena”ya toplaşan tovuzlu tərəfdarlar vacib oyunda xal itkisinə baxmayaraq, pirotexniki vasitələrdən yararlandı. AFFA İntizam Komitəsinin nəzərindən yayınmayan qayda pozuntusu klubu təbii olaraq 1500 manat ziyana saldı. Qəribə deyilmi? Xal itkisi, ölkəmizi avrokuboklarda təmsil etmək ehtimalının azalması fonunda pirotexniki vasitəyə nə ehtiyac var? “Turan Tovuz”un xüsusilə infrastruktur məsələləriylə bağlı genişmiqyaslı planları varsa, kluba maddi ziyan vurmaq nə dərəcədə məntiqəuyğundu?

Və təəssüf ki, hər şey bununla yekunlaşmır. Tovuzlu tərəfdarlar 12-ci turun “Turan Tovuz” – “Qarabağ”, 19-cu turun “Kəpəz” – “Turan Tovuz” oyunlarında da pirotexniki vasitədən istifadə edib. Bu o deməkdi ki, “bozqurd” indiyə qədər bu qayda pozuntusu üzündən 4500 manat ziyana düşüb. Amma tərəfdarların kluba vurduğu maddi zərər bununla da bitmir!

Azarkeşlər cari mövsüm ərzində 4 matçda meydana kənar əşyalar atıb ki, klub hərəsinə görə 800 manat cərimələnib. Həmçinin “Turan Tovuz” tərəfdarlarının hakimlərin və rəqib komandaların ünvanına kütləvi şəkildə təhqiramiz ifadələr səsləndirməsi üzündən hələ davam edən futbol ili”ndə 3800 manat itirib.

Beləliklə, klub mövsüm ərzində azarkeşləri üzündən 11500 manat cərimələnib.

KƏNAN BAHADIR