15 sarı, 1 qırmızı vərəqə əslində turun yetərincə sakit keçdiyinə, meydanda ehtirasların aşıb-daşmadığına işarədi.

Uzaqbaşı “Turan Tovuz” – “Səbail” oyunun fərqləndirmək olar ki, Tovuzda, doğrudan da, illərin təcrübəsi Kurban Berdıyevi heç vaxt olmadığı qədər qəzəbli gördük. Elçin Məsiyev meydandan kənarda onu, meydanda isə Pavol Şafrankonu qırmızı vərəqə ilə cəzalandırmaqla vəziyyəti qaydasına salmağa çalışdı. Turla bağlı daha bir maraqlı məqam odu ki, “Səbail” – “Qarabağ” oyununda komandalardan heç biri cəzalanmadı.

Sumqayıt – Şamaxı, RƏVAN HƏMZƏZADƏ
Autsayderlərin duelinin daha prinsipial şəraitdə keçəcəyini düşünsək də, gözləntilərimiz doğrulmadı. Daha doğrusu, 1-ci hissədə meydan sahibləri, 2-ci hissədə qonaqlar daha inamlı təsir bağışladı ki, sonda “şirlər”sevindi. Bir də böyük ehtimalla ədalət təmsilçisi. Çünki komandalar kobud qayda pozuntularına yol verməkdən çəkindi. Bəlli məsələdi ki, həlledici mərhələyə qədəm qoyan futbolçular onları daha gərgin matçların gözlədiyini dərk edir və cəzalı duruma düşməkdən çəkinir. Daha çox kiçik foullara şahidlik etdik ki, burda doğru qərar vermək Həmzəzadə kimi təcrübəli hakim üçün su içmək qədər asandı. Baş məşqçilər də onun idarəçiliyindən narazı qalmadı.

Neftçi – Zirə, RƏŞAD ƏHMƏDOV
Məhsuldar, yetərincə gərgin, tez-tez süjeti dəyişən paytaxt derbisi xeyli məqamla yadda qalsa da, hakim qərarları müzakirə mövzusu olmadı. Əslində belə prinsipial matçdan sonra ədalət təmsilçisinin davranışı gündəmə gəlməyibsə, hansısa qərəzdən və ya səhvdən danışmaq doğru olmaz. Yenə də Rəşad Əhmədovun, demək olar ki, qüsursuz idarəçiliyini vurğulamaqda fayda var. “Neftçi”nin qapısına təyin edilən hər iki penalti haqlı idi. Birincidə Azər Salahlı Salifu Sumaya qarşı kobudluq etmiş, ikincidə Elvin Camalov əllə oynamışdı. Düzdü, “ağ-qaralar”ın baş məşqçisi Samir Abasov hakimin qərarına etiraz etdiyi üçün “sarı” oldu. Lakin yenə də hansısa haqsızlıqdan bəhs edə bilmərik. Hakim müdaxiləsinə ehtiyac duyulan anlarda nə əndazəni aşdı, nə də peşə prinsiplərinə xələl gətirdi.

Səbail – Qarabağ, TURAL QURBANOV
Qonaqların aşkar üstünlüyü şəraitində keçən matçda Tural Qurbanovun üzərinə düşən iş oyunun axarına nəzarət etmək və ...Leandro Andradenin qollarını qeyd etmək oldu. Referi heç bir futbolçuya sarı vərəqə göstərmədi. Hakimin “çiynindəki yük” yüngül oldu. Qurbanov göstərdi ki, hakimin yersiz müdaxilələri olmayanda oyun daha baxımlı alınır.

Turan Tovuz – Sabah, ELÇİN MƏSİYEV
Tovuzda ehtiraslar çox tez coşdu. Gərginliyin əsası 19-cu dəqiqədə - Ayxan Hüseynov çiyin-çiyinə mübarizə zamanı Rəhman Daşdəmirovu yerə sərəndə qoyuldu. Berdıyev referinin epizodu yanlış təfsir etdiyi iddiası ilə narazılığını çatdırdı. Məsiyev dərhal ona “qırmızı”, Yunis Hüseynova “sarı” göstərdi. Referinin 45+2-ci dəqiqədə Şafrankonu meydandan qovması sanki odun üzərinə su səpdi. Tovuzlular meydandan məğlub ayrılsaydı, təbii ki, idarəçilik daha böyük söz-söhbət doğuracaqdı. Bu başqa məsələ ki, Vasili Berezutski də Şafrankonun qovulmasını “futbolla əlaqəsi olmayan “qırmızı” kimi dəyərləndirdi.

Kəpəz – Araz-Naxçıvan, KAMAL UMUDLU
Hakim idarəçiliyi ilə bağlı hansısa mənfi fikir söyləmək çətindi. Tovuzda lazımi dramatiklik görmədik. Ümumilikdə oyun sakit şəkildə keçdi. Kamal bəy hər komandadan bir futbolçuya sarı vərəqə göstərdi. “Kəpəz”in baş məşqçisi Azər Bağırov hakim qərarlarına etiraz etdiyinə görə “sarı” aldı. Ümumilikdə Umudlunun nəticəyə təsir edən səhvi yox idi.