“Fənərbaxça”nın stadionunun adı dəyişə bilər!
İstanbul nəhəngi “Fənərbaxça” dünən “1907 Fənərbaxça Dərnəyi”nin 30 illik yubileyini möhtəşəm şəkildə qeyd etdi.
1992-ci ildə yaradılan dərnək “Fənərbaxça”nın və Türkiyə idmanının inkişafı üçün nəzərdə tutulan bir çox layihənin həyata keçməsində mühüm rol oynayıb. Tədbirin bədii hissəsində “Ülkər” stadionunda quraşdırılan səhnədə bəstəkar və pianoçu Fahir Atakoğlu, eləcə də “Mor və ötəsi” qrupu çıxış etdi. Məşhur gülüş ustası, eyni zamanda “Fənərbaxça” azarkeşi kimi tanınan Cem Yılmazın açılış sözlərindən sonra tədbirə start verildi. Günün ilk yarısına təsadüf edən yubileyin rəsmi hissəsində isə maraqlı bir məqam diqqəti cəlb etdi. Belə ki, dərnəyin başqanı Rıfat Perahya Türkiyə cümhuriyyətinin 100 illik yubileyi ilə bağlı önəmli bir təklif irəli sürdü. O, hələ 1908-ci ildən qurulan, uzun illər “Şükru Saracoğlu” adlanan və 2015-ci ildə “Yıldız Holdinq” şirkəti ilə imzalanan 90 milyon dollarlıq sponsorluq anlaşması əsasında 10 illik müddətə adı “Ülkər” olaraq dəyişdirilən stadiona Atataürkün adının verilməsini təklif etdi. “Fənərbaxça” prezidenti Əli Koç bu təklifi müsbət qarşılasa da, stadionun adının dəyişdirilməsi proseduru ilə bağlı bəzi məqamları qeyd etməli oldu. Onu da bildirək ki, Əli Koç özü də vaxtilə 13 il “1907 Fənərbaxça Dərnəyi”nin başqanı vəzifəsini icra edib. Koç bunları dedi:
“Bu dərnək “Fənərbaxça”ya çox şey qazandırıb və mən də bu hekayənin bir parçası olmağımla fəxr edirəm. Türkiyə Cümhuriyyətinin 100-cü ilində “Cümhuriyyətin Fənəri” olaraq əl-ələ verib və “Fənərbaxça” ətrafında birləşib mübarizəmizi davam etdirəcəyik. Bu gözəl ölkənin qurtuluşunda, eləcə də quruluşunda önəmli vəzifələr icra etmiş etmiş bir klub kimi belə yubiley ilində çempionluq ən çox bizə yaraşır. Stadionun adınını dəyişdirilməsinə gəlincə, bu mövzu əvvəllər bir neçə dəfə klubun rəsmi üzvlərinin toplantısında gündəmə gətirilib. Bu ideyanın həyata keçməsində heç bir problem görmürəm. Amma bu, bir-iki nəfərin yox, bütün camiənin arzusu və istəyi olmalıdı. Bu məsələnin sona qədər arxasında duracağıq. 100-cü ilimiz tamamlanmadan, bəlkə də elə həmin tarixdə, yəni gələn ilin oktyabrın 29-da bunu həyata keçirə bilərik. Amma ilk növbədə Saracoğlu ailəsi, eləcə də “Ülkər” şirkətlər qrupu ilə görüşüb onların fikrini öyrənməliyik”.
Digər xəbərlər
