Ölkə kubokunda yarımfinal mərhələsinin ilk oyunları geridə qaldı. “Araz-Naxçıvan” qəbul etdiyi “Qarabağ”ı məğlub etdisə (1:0), “Sabah” “Neftçi”nin meydanından qalib ayrıldı (2:1). Deməli, Muxtar Respublika və Masazır təmsilçiləri cavab oyunlarında üstün tərəf kimi meydana çıxacaq. Bu öz yerində. Amma...

Maraqlıdı ki, “köhlən atlar” “Liv Bona Dea Arena” keçirilən oyunda özünə bənzəmədi. Təbii ki, səbəblərdən biri ağdamlıların Misli premyer-liqasının 28-ci turu çərçivəsində “Turan Tovuz”la səfər matçının yorğunluğundan hələ xilas ola bilməməsiydi. Qurban Qurbanov bu üzdən Kadi Borges, Leandro Andrade və Abdulla Zubir kimi çox önəmli futbolçularını start heyətində meydana buraxmadı. İlk dəqiqələrdən tər tökməyə başlayan Musa Qurbanlı, Aleksey Kaşuk və Emmanuel Addainin qol fürsətlərini sağa-sola xərcləməsi isə meydan sahiblərini sevindirdi. Hadisələrin axarını dəyişmək istəyən Qurban bəyin məqsədinə çata bilməməyinin əsas səbəbi isə “Araz-Naxçıvan”ın bəlkə də mövsümdə ən yaxşı oyununu keçirməsi oldu. Elmar Baxşıyevin komandası sanki premyer-liqanın 26-cı turunda yaşanan məlum hadisələrə görə “Qarabağ”dan qisas alırdı.

İş orasındadı ki, naxçıvanlılar daha ciddi üstünlük əldə edə bilərdi. Lakin baş məşqçinin Ramon Maçado və Alan Dias kimi futbolçulara start heyətində şans verməməsi onları bu şansdan məhrum etdi. Əlbəttə, belə qəribə addımın səbəbi mənə çox maraqlı idi. Lakin Baxşıyev mətbuat konfransında ünvanladığım sualı cavabsız qoymaqla məni uzun müddət beynimi məşğul edəcək, “Araz-Naxçıvan”ın mübarizəni dayandıracağı təqdirdə mütəxəssisi bir daha tənqid etməyimə səbəb olacaq məqamla baş-başa qoydu. Düzü, bu mənada Samir Abasov da həmkarından fərqlənmir. Dəfələrlə səhv seçimlərinə görə irad eşidən mütəxəssis hələ də optimal start heyətini müəyyənləşdirməkdə çətinlik çəkdiyindən “Neftçi”ni uçuruma aparır. O başqa məsələ ki, “Sabah” da “Araz-Naxçıvan” kimi daha ciddi üstünlük qazana bilərdi. Lakin baş hakim Əliyar Ağayev “bayquşlar”ın ana südü kimi halal penaltisini təyin etməməklə növbəti dəfə həm imicini korladı, həm də ən təcrübəli yerli hakim və FİFA referisi olmasına rəğmən, hakimliyimizin səviyyəsini şübhə altına saldı. Hər halda, oyuna qədər bu cütün favoritini tapmaqda çətinlik çəkirdiksə, indi “Neftçi”nin mübarizəni dayandıracağı ehtimalı bir qədər yüksəkdi.

Hər şeyər rəğmən, bizi çox maraqlı cavab oyunları gözləyir. Həlledici matçların çox gərgin keçəcəyinə şübhə yoxdu. Qısası, kubok uğrunda mübarizə hələ indi başlayır!

KƏNAN BAHADIR