Ölkə kubokunun yarımfinal mərhələsinin ilk oyunları çərçivəsində keçirilən "Neftçi" - "Sabah" oyunu Masazır təmsilçisinin qələbəsiylə başa çatdı - 2:1.

Xəbər verdiyimiz kimi, matçın 90+1-ci dəqiqəsində Yuri Matias cərimə meydançası daxilində Coy-Lens Mikelsin ayağına zərbə endirərək zədələdi. Burda baş hakim Əliyar Ağayev və VAR hakimi Rauf Allahverdiyevin məsuliyyətsiz yanaşması üzündən penalti təyin edilmədiyini yazmışıq. AFFA Hakimlər Komitəsinin sədri Frank De Blekere də bunu etiraf edib.

Bəs, Coy-Lens Mikelsin durumu necədi? "Bayquşlar"ın 8 qolla bombardirlər siyahısında yer alan futbolçusu bu gün Misli premyer-liqasının 29-cu turunda evdə "Kəpəz"ə qarşı keçiriləcək oyunda komandasına yardım edə biləcəkmi?

Sualı Masazır təmsilçisinin mətbuat xidmətinin rəhbəri Elnur Həmidov cavabladı. Klub rəsmisi "Football-plus.az"a açıqlamasında Mikelsin MRT müayinəsindən keçdiyini, lakin hələ nəticələrin bəlli olmadığını dedi. Yəni futbolçunun hansı müddətə sıradan çıxdığına aydınlıq gəlməyib. O bəllidi ki, almaniyalı bu gün meydana çıxmayacaq.

Xatırladaq ki, "Sabah" - "Kəpəz" matçı saat 17.00-da başlayacaq.

KƏNAN BAHADIR