İnternetdə yayılan “Flamenqo”nun məşqini əks etdirən videolar böyük maraq və təəccübə səbəb olub.

"Football-plus.az" xəbər verir ki, bəziləri ilk baxışdan qapıçılar üçün yeni sınaq metodu hazırlandığını düşünə bilərlər, amma braziliyalıların nəsə yeni bir metoddan istifadə etdikləri dəqiqdi. Mənzərə isə çox qəribə görünür: çünki qapıçılar məşqdə üçkünc topları dəf edirlər!

Xüsusi metod
Üçbucaqşəkilli toplar beynəlxalq aləmdə “Reflex-Ball” adı ilə tanınır. Yanvarda “Qarabağ”dan “Flamenqo”ya keçən Olavio Juninyonun yeni klubuna məxsus olan “Coluna do Fla” portalında yeni ideya belə izah olunur:

Videoda qapıçı Mateus Kunyanın əksər zərbələri yetərincə asanlıqla dəf etdiyi gözə çarpır. Əslində isə əlcək sahibinin işi heç də göründüyü qədər sadə deyil. “Coluna do Fla”nın reportajında səslənən bir sitatda belə deyilir:

Qapıçı qeyri-adi topa reaksiya verərkən adi topa qarşı oynayırmış kimi seyv etməyə çalışır. Məşq zamanı adi rejimdən qeyri-adi rejimə keçməklə sanki səviyyəsini artırır. “Coluna do Fla” üçün reportaj hazırlayan müxbir bunu vurğulamağı lazım bilir: “Flamenqo”nun qapıçıları yalnız qeyri-adi toplarla məşq edəcəklərsə, absurd olacaq”. İstənilən halda üçkünc toplar yeni norma deyil, hazırlığı rəngarəng etmək cəhdidi.

“Reflex-Ball” azı 11 ildi istifadə olunur
Maraqlıdı ki, internetdə 2014-cü ilə aid olan video da var: həmin videoda qapıçının üçbucaqşəkilli topla məşq etdiyi görünür. Bu təsviri internetə qapıçıların hazırlığı üzrə polşalı ekspert Marek Draqoş qoyub.

Maraq üçün qeyd edək ki, o, dünyanın dörd bir yanında olan qapıçılara kömək edir: Draqoş indiyədək Keniya, Kamerun, Hindistan, Qambiyada və Avropanın bir çox ölkələrində işləyib.
“Reflex-Ball” ideyası polşalının beyninə azı 11 il əvvəl “daxil olub”. Amma Marek bu yeniliyi həvəskar futbolu səviyyəsində reallaşdırıb. Üçkünc toplar hərdən uşaqların və qeyri-peşəkarların məşqində istifadə olunur. “Coluna do Fla”nın materialında isə “Reflex-Ball”dan Avropanın bəzi ölkələrində, məsələn, İngiltərə və Almaniyada tez-tez istifadə olunduğu bildirilir. Ancaq görünür, belə toplara peşəkar futbolun ən yüksək səviyyəsində ilk dəfə rast gəlinir.

Filipe Luis eksperimenti sevir
İndi isə peşəkar futbolda qeyri-adi yeniliyi tətbiq edən şəxs və onun məşq metodu ilə bağlı fikirləri ilə tanış olaq. Söhbət “Flamenqo”nu çalışdıran Filipe Luisdən gedir. Onun yaxın keçmişin məşhur futbolçularından olduğu məlumdu. Sabiq sol cinah müdafiəçisi yetirməsi olduğu “Fiqeyrense”də 2003-05-ci illərdə top qovandan sonra Avropaya üz tutub. Bu qitədə İspaniyada “Real”ın ikinci komandasında, “Deportivo” və “Atletiko”da, İngiltərədə “Çelsi”də oynayıb. “Atletiko”nun formasını 8 il geyən braziliyalı karyerasını 2023-cü ildə vətənində - “Flamenqo”da başa vurub. Braziliya yığmasında 10 il (2009-19) ərzində 44 oyun keçirib və 2 qol vurub.

Maraqlıdı ki, futbolçu həyatını başa vurandan bir il sonra Rio de Janeyro klubuna baş məşqçi təyin olunub. Bu vəzifədəki debütü uğurlu alınan Filipe Luis komanda ilə Braziliya kuboku və superkubokunu qazanıb.

39 yaşlı mütəxəssis məşq prosesində eksperimentləri çox sevir, qapıçıların hazırlığında çoxmüxtəlifliyə xüsusi dəyər verir. Məsələn, ötən il VR-dəbilqələrdən istifadə edib, indi isə hamını üçbucaqşəkilli toplarla təəccübləndirir. Gənc məşqçi ümumilikdə hücumameyilli futbola üstünlük verir. “Flamenqo”nun gənclərdən ibarət komandasını çalışdırarkən bunu etiraf edib:
Bu da fakt: “Flamenqo” A seriyasının ötən mövsümündə hamıdan çox – 61 qol vurub, amma öz qapısında heç də az top görməyib – 42. Ola bilsin ki, baş məşqçi buna görə indi məşqdə qapıçıların hərtərəfli hazırlığına xüsusi diqqət yetirir. Əlcək sahiblərinin istənilən formalı toplara qarşı oynamaq bacarığı tezliklə start götürəcək yeni mövsümdə komandanın arxa xətdəki işinə çox yaraya bilər.

2024-cü ili 3-cü yerdə başa vuran “Flamenqo”nun çempion “Botafoqo”dan 9 xal geri qaldığını da yada salaq.