"Çalışacağıq ki, bu mərhələdə ilk qələbəmizi qazanaq" - millimizin üzvü
"Bu dəfə daha inamlı oynadıq. Bir növ Bosniya və Hersoqovina ilə görüşdəki səhvlərdən nəticə çıxarmışdıq. Həm də Xorvatiyanın Türkiyəyə qarşı keçirdiyi oyunu da zalda izləmişdik. Rəqibimizi əyani görmüşdük".
"Football-plus.az" xəbər verir ki, bu sözləri 19 yaşadək futzalçılardan ibarət millimizin üzvü Fariz Hüseynov deyib.
Qollardan birinin müəllifi olan futzalçı Avropa çempionatının əsas mərhələsində meydan sahibləri Xorvatiya yığması ilə heç-heçə etdikləri (3:3) oyunla bağlı Azərbaycan Futzal Federasiyasının mətbuat xidmətinə fikirlərini bölüşüb:
"Çalışdıq səhvləri təkrarlamayaq, əksinə, düzəldək. Şükür olsun ki, bunu bacardıq. Xorvatiyadan heç də zəif oynamadıq. Qol vurduğum epizoda gəldikdə, əlbəttə, sevindirici məqamdı. Üstəlik bu qolu Xorvatiya kimi güclü rəqibin qapısına vurursansa, iki qat sevinc olur. Heyifsilənirik ona görə ki, qələbəni əldən verdik. Oyunun böyük hissəsini hesabda üstün keçirdik. Sona 12 saniyə qalmış qol buraxsaq da, ruhdan düşmədik, sona qədər mübarizə apardıq və heç-heçə qolunu vurduq. Qələbə də qazana bilərdik. Bu oyunlar bizim üçün əvəzsiz təcrübədi. Qarşıda bir görüşümüz qalıb. Türkiyə millisi qrupun sürpriz nəticə qazanan kollektividi. Qardaş ölkənin yığması ilə də sona qədər mübarizə aparacağıq. Bu matça hazırlaşmaq üçün bir gün vaxtımız olacaq. Çalışacağıq ki, bu mərhələdə ilk qələbəmizi qazanaq”.
Digər xəbərlər
