''Fənərbaxça''nın təcrübəli futbolçusu Duşan Tadiç adını klub tarixinə yazdırmaq üzrədi.

''Football-plus.az'' xəbər verir ki, serbiyalı ulduz cümə günü ''Bodrum''a qarşı meydana çıxacağı təqdirdə İstanbul nəhəngində yubiley - 100-cü oyununu keçirəcək.

36 yaşlı yarımmüdafiəçi Türkiyəyə gəldiyi 2023-ün yayından bu yana çox nadir hallarda oyun buraxır. ''Fənər'' ötən mövsüm İsmayıl Kartalın başçılığı altında 58 rəsmi oyun keçirmiş və Tadiç bunların 56-da meydanda olmuşdu. Onun buraxdığı iki oyundan biri ''Qalatasaray''a qarşı qalmaqallı superkubok matçına təsadüf etmişdi ki, həmin derbidə də ''Fənər'' zatən meydana gənclərdən ibarət komanda ilə çıxmışdı.

İlk mövsümündə 56 qarşılaşmada 16 qol, 16 məhsuldar ötürməlik diqqətçəkən performans sərgiləyən Tadiç bu mövsüm Joze Mourinyo üçün də önəmli oyunçulardan biridi. O, ''sarı-lacivərdlilər''in superliqada keçirdiyi 26, avrokuboklarda keçirdiyi 16 oyunun hamısında iştirak edib! Tadiç yalnız ölkə kubokunda 3 görüşün 2-ni buraxıb. Yəni ünlü futbolçu ''Fənər''in cari ''futbol ili''ndə keçirdiyi 45 rəsmi oyunun 43-də forma geyərək aktivinə 11 qol, 15 məhsuldar ötürmə yazıb.

Başqa sözlə desək, Tadiç iki mövsüm ərzində ''Fənər''in 103 rəsmi oyununun 99-da iştirak edib və 27 qol, 31 məhsuldar ötürməlik performans sərgiləyib. Bu iki il ərzində centlelmenliyi ilə diqqət çəkən Tadiç bir dəfə də olsun cəza üzündən oyun qaçırmayıb. Təbii ki, ''Fənər'' tarixində 100 rəsmi oyun keçirən əcnəbi futbolçuların sayı kifayət qədərdi. Amma onların heç biri bu göstəriciyə 2-ci mövsümdə nail olmayıb. Tadiç cəmi 2-ci mövsümündə 100 oyun həddinə çatan klub tarixinin ilk futbolçusu olacaq! Bir faktı da qeyd edək ki, ''Fənər''in son iki mövsümdə 103 oyun keçirməsinin özü də rekord göstəricidi. Buna qədər klubun tarixində iki mövsümə 100-dən çox oyunun keçirildiyi dönəm olmamışdı!

Özü də nəzərə alaq ki, ''Fənərbaxça'' mövsümün sonuna qədər hələ ən azı 10 rəsmi oyun da keçirəcək.