17 yaşadək qadın futbolçulardan ibarət millimiz Avropa çempionatının 2-ci seçmə mərhələsində bu gün Malta ilə qarşılaşacaq.

“Football-plus.az” xəbər verir ki, B Liqasının 2-ci qrupunda yer alan komandaların oyununu portuqaliyalı baş hakim Filipa Pereyra Kunya idarə edəcək.

Görüş Bayıl stadionunda, saat 13.00-da başlayacaq. Qrupun digər matçında eyni vaxtda Lüksemburq və Bolqarıstan kollektivləri üz-üzə gələcəklər.

Son turdan öncə Lüksemburq 6 xalla qrup lideridi. Azərbaycan və Bolqarıstan milliləri hərəyə 3 xalla müvafiq olaraq 2-ci və 3-cü pillələrdə qərarlaşıblar. Qrup sonuncusu Maltanın hesabında xal yoxdu.

Qeyd edək ki, Nərgiz Qurbanovanın rəhbərlik ediyi Azərbaycan millisi qrupda daha əvvəl keçirdiyi görüşlərdə Lüksemburqa 0:5 hesabı ilə məğlub olub, Bolqarıstana isə qalib gəlib - 3:2.