Məlum olduğu kimi, növbəti mövsümdən premyer-liqada legioner limiti ləğv olunacaq. Yəni komandalar meydana 11 əcnəbi futbolçuyla çıxmaq hüququ qazanacaq.

Bu qərarın yerli futbolçuların karyerasına nə dərəcədə müsbət və ya mənfi təsir edəcəyini zaman göstərəcək. Amma bəlli olan məsələ belə sistemin böyük büdcəyə malik klubların işinə daha çox yarayacağıdı. Təbii ki, söhbət maliyyədən gedirsə, ağla gələn ilk üç klub “Qarabağ”, “Sabah” və “Neftçi”di. “Köhlən atlar”ın baş məşqçisi Qurban Qurbanov artıq yay “transfer pəncərəsi”ndə heyətdə ciddi dəyişikliklərin olacağının mesajını verib. “Ağ-qaralar”la bağlı mövzu da ortadadı. Paytaxt təmsilçisinin yayda heyətdə bağlı böyük addımlar atacağı hələ legioner limiti ləğv edilmədən bəlli idi. Hər halda, “Qarabağ”la “Neftçi” hələ bu yöndə ilkaddımları belə atmayıb. Əksinə, həm Qurban Qurbanov, həm də Samir Abasov tez-tez tənqid hədəfinə çevrilsə də, yerli futbolçulara şans verməyə davam edir. Bu yöndə ən ciddi problem “Sabah”ın tələskənliyidi.

Redaksiyamıza daxil olan məlumata görə, Masazır təmsilçisi növbəti mövsüm çempionluq uğrunda mübarizə aparacaq. Klub rəhbərliyi bu məqsədlə xeyli legioner transfer etməyi planlaşdırır. İndidən yeni futbolçular üçün yer hazırlanır. Daha doğrusu, yerli oyunçular heyətdən uzaqlaşdırılır. “Bayquşlar” əvvəlcə Qazaxıstan millisinin qapıçısı Stas Pokatilovu transfer edərək iki perspektivli qapıçının – Yusif İmanovla Nicat Mehbalıyevin “qələmini qırdı”. Ardınca uzun illər kapitan sarğısını daşıyan, zəngin təcrübəyə malik Elvin Camalov “Neftçi”yə keçdi. Bu yaxınlarda isə iki yerli oyunçu Abdulla Rzayev və Şakir Seyidov əvəzedici heyətə göndərildi və yenidən premyer-liqada görünmək ehtimalları sıfra bərabərdi.

“Sabah”ın hələ ki “sağ saxladığı” həmyerlilərimiz də var. Məsələn, Rəhman Daşdəmirov, Amin Seydiyev, Anatoli Nuriyev, Tellur Mütəllimov, Ayaz Quliyev, Abdulax Xaybulayev əsas komandada rahatlıqla forma geyə bilir. Lakin kollektivin mövsüm ərzində imza atdığı uğursuz nəticələr onların da qalanlarının aqibətini yaşayacağını göstərir. Qısası, “bayquşlar” hələ yerli futbolçuların “qətliam”ına davam edəcək.

KƏNAN BAHADIR