"Sumqayıt" ölkə kubokunun 1/4 final mərhələsinin evdə keçirilən cavab oyunu çərçivəsində "Sabah"a böyük hesabla uduzdu - 0:4.

"Football-plus.az" xəbər verir ki, "kimyaçılar"ın baş məşqçisi Vaqif Cavadov oyunsonrası mətbuat konfransında jurnalistlərin suallarını cavabladı.

- İnanıram ki, hamı iki fərqli hissə izlədi. Məğlub olmamalı idik, amma uduzduq.

- İki kubok, səkkiz premyer-liqa matçında nəinki qələbə qazanmısız, qol belə vurmamısız. Nə düşünürsüz?
- Komanda hücum cəhdləriylə yadda qalır... Ümumiyyətlə, belə hallarda ya məşqçi gedir, ya da futbolçular. Məğlub olduq, deməli, nəyəsə gücümüz çatmır. Problem məndədisə, getməyim komandanın xeyrinə olacaqsa, gedərəm. Amma bu problemdən xilas ola bilərik. Ancaq irəli baxmalıyıq. İnanıram ki, mənə dəstək göstərəcəksiz.

- Həmişə gənc və yerli mütəxəssislərə dəstək olmuşuq. Bu öz yerində. Siz problemi nədə görürsüz?
- Futbolçular yetərsizdi. Hücumlar etsək də, qol vura bilmirik. Nəsə çatmır. "Sabah"ın dörd fürsəti oldu. Hamısını qolla tamamladılar. Komanda nə vaxtsa sonuncu pillələrdə olsa, gedərəm. Amma gec-tez bu problemdən qurtulacağımıza inanıram. Hamını başa düşürəm. Futbolçularımın arxasındayam. Bu gün problemin təkcə məndə olduğuna inanmıram. Mən hamıyla açıq danışıram. Bəzən deyirlər ki, Vaqif Cavadov çox danışır, işini görməlidi. Tövsiyənizi qəbul edirəm. Bundan sonra az danışacam.

- Komanda neçə oyun qol vura bilməməlidi ki, azarkeşlərdən üzr istəyəsiz?
- Mən niyə üzr istəməliyəm? O vaxt üzr istəyərəm ki, komanda aşağı liqaya yuvarlanmaq təhlükəsiylə üz-üzə qalsın. Bəli, razıyam ki, problem var. Açıq-aşkar qol vura bilmirik. Yeni transferlər etmişik. Amma heç kim deyə bilməz ki, bu addımlar nə vaxt öz bəhrəsini verəcək... Əfsuslar olsun ki, futbolda belə hallar baş verir. İndi fikrimizi premyer-liqaya cəmləməliyik. Qarşıda "Kəpəz" və "Şamaxı"yla oyunlar var. Həmin matçlardan çox şey asılı olacaq.

- Yeni transferlərin komandaya gəlməsində sizin nə dərəcədə rolunuz olub? Çatışmazlıqlar barədə rəhbərliyə hesabat təqdim etmisizmi?
- Biz cəmi üç transfer etmişik. Bu işlərlə klub rəhbərliyi, seleksiya xidməti və baş məşqçi məşğul olur. Təbii ki, qış fasiləsində yaxşı futbolçu tapmaq çətindi. İstəsək də, daha çox və yaxşı oyunçu ala bilməzdik. Gücümüz çatmır. Mən də robot deyiləm, futbolçular da. Bir neçə həftə meydana çıxmayan, hətta təlim-məşq toplanışı keçməyən futbolçunu 90 dəqiqə oynatmaq böyük riskdi.

- Uğursuzluqlar komandaya psixoloji baxımdan mənfi təsir göstərir. Azarkeşlər "Vaqif, 1-ci liqa bizi gözləyir" şüarı səsləndirir. Sizcə, "Sumqayıt" premyer-liqadakı yerimi qoruya biləcəkmi?
- Mən nostradamus deyiləm ki, gələcəyi görüm. Məncə, bir qələbə hər şeyi həll edəcək.

- Maraqlıdı ki, komanda məhz qış fasiləsindən, sizin klubla müqavilə imzalamağınızdan sonra uğursuz nəticələr göstərməyə başladı...
- Kaş ki, o müqaviləni bağlamazdım (gülür). Biz "Sabah" deyilik ki, oyun ərzində çoxlu qol epizodu yaradaq. Fürsətlərimiz az olur, ondan da istifadə edə bilmirik.

KƏNAN BAHADIR