"Sumqayıt" Misli premyer-liqasının səfərdə keçirilən 24-cü tur matçında "Neftçi"yə uduzdu - 0:1.

"Football-plus.az" xəbər verir ki, "kimyaçılar"ın baş məşqçisi Vaqif Cavadov oyunsonrası mətbuat konfransında jurnalistlərin suallarını cavabladı.

- "Neftçi"ni qələbə mübasibətilə təbrik edirəm, onlara uğurlar arzulayıram. Hadisələrin axarını gördüz. İnanıram ki, həm oyunla, həm də hakimliklə bağlı ədalətli təhlillər yazacaqsız.

- Hər şeyi media nümayəndələrinin öhdəsinə buraxdız...
- Sizin ədalətli yazılarınızı oxumuşuq. İnanıram ki, yenə belə məqalələr yazacaqsız. Komandam üçün ancaq irəli getməsini arzulayıram. Futbolçularımdan razıyam. Son 10 dəqiqəyə nəzər yetirin. Meydançada verilən qərarlara baxın. Mən danışsam, cəzalandırılacam. Başqa məsələlər haqda danışmaq istəmirəm. Artıq nəsə dəyişməyəcək.

- Aydındı ki, hakimlikdən narazısız. Bəs, həmin anlara qədər olan oyunu nexə dəyərləndiriesiz?
- Təbii ki, səhvlərimiz də oldu. Amma həmin anlara qədər üstün oynadıq. Qol epizodları yaratsaq da, yararlana bilmədik.

- Hava şəraiti planlarınızı pozdumu?
- Əvvəlcədən belə olacağından xəbərdar idik. Planımıza hansısa təsiri olmadı.

- Komanda son matçlarda birinci hissədə yaxşı oynasa da, ikinci yarıda eniş yaşanır.
- Bu fikrinizlə razıyam. Amma yeni və zədədən qayıdan futbolçuları indidən yükləmək istəmirik. Yoxsa sonra problemlər yaranacaq.

- Ötən oyun cadu, bu dəfə hakimlik... Komandanın günahı yoxdu?
- Mən cadudan bəhs etməmişəm. Bu gün VAR-da olan hakimlərin qərarlarına baxın. Qərarlar ədalətli olsa, nəticələrimiz yaxşı olar. Amma futbolda danışmaq yox, çalışmaq lazımdı. Növbəti oyuna hazırlaşmalıyıq.

- Qarşıda "Sabah"la kubok matçı var. Bu rəqibi mübarizədən kənarlaşdıra biləcəyinizə inanırsızmı?
- İlk oyun göstərdi ki, bu rəqibə qarşı oynaya bilərik. İlk matçdakı nəticə bizim şanslarımızın olduğunu göstərib. İnanıram ki, həmin oyunda qol vuracağıq.

- Yavaş-yavaş sonuncu pillələrə yuvarlanırsız. Bu, sizi narahat etmir?
- Siz belə sualla intiriqa yaradırsız. Gəlin, düz danışın. 22 xalımız var. "Səbail" 17 xalla sonuncu pillədədi. Deməli, hazırda təhlükəli zonada olsaq da, indi nəsə baş vermir. Bizi "Şamaxı" da uda bilər, başqası da. Məni komandamın daha yaxşı çıxış etməsini istəyirəm.

KƏNAN BAHADIR