"Sumqayıt" kubok matçına ciddi yanaşmaya bilər" - Arif Əsədov "Sabah"ı daha şanslı saydı
Ölkə kubokunun 1/4 final mərhələsində keçiriləcək vacib oyunlardan biri də "Sumqayıt"la "Sabah" arasındadı. Ona görə ki, son 9 matçda qola və qələbəyə həsrət qalan "kimyaçılar" avrokuboklara yollanmaq uğrunda mübarizəni kubok yoluna daşıyan "bayquşlar"ı sınağa çəkəcək.
Bəllidi ki, hər iki komanda məqsədəuyğun mövqelərdə qərarlaşmayıb. Belədə matçın yetərincə gərgin və baxımlı keçəcəyini düşünmək olar. Bəs, hansı tərəfin yarımfinala yüksəlmək şansı daha yüksəkdi?
"Football-plus.az" oyundan gözləntilərlə bağlı mütəxəssis fikrinə ehtiyac duyduğundan Arif Əsədovla əlaqə saxladı. Onun cavabı:
"Təbii ki, qarşılaşma çox maraqlı keçəcək. Hər iki komandanın növbəti mərhələyə yüksəlmək şansı var. Məncə, qələbə daha çox "Sabah"a lazımdı. Masazır təmsilçisi ölüm-dirim mübarizəsinə çıxacaq. Ona görə ki, bu komandanın premyer-liqa yoluyla avrokuboklara yollanmaq ehtimalı çox zəifdi. "Sumqayıt" isə çox təhlükəli zonadadı. Komandanın iki cəbhədə döyüşə bilməsi çətin görünür. Bu üzdən kubok matçına ciddi yanaşmaya bilərlər. Ümumiyyətlə, "bayquşlar" həm say, həm də keyfiyyət baxımından daha üstün heyətə malikdi. Qısası, "Sabah"ın şansı daha yüksəkdi".
KƏNAN BAHADIR
Digər xəbərlər
