Rauf Cabbarov AFFA nümayəndəsinin səlahiyyətlərini mənimsəyib?
Bilindiyi kimi, fevralın 23-də keçirilməli olan “Zirə” – “Kəpəz” oyunu bir gün sonraya qaldı.
Peşəkar Futbol Liqasının “feysbuk” hesabında fevralın 23-ü, saat 17.42-də belə bir açıqlama yer alıb: “Zirə İdman Kompleksinin ot örtüyü səhər saatlarından etibarən bütün lazımi tədbirlərin görülməsi nəticəsində “Zirə” – “Kəpəz” matçının keçirilməsi üçün hazır vəziyyətə gətirilsə də, oyunöncəsi qar yağışı şiddətini artırıb. Nəticədə qarşılaşmanın baş tutması üçün minimal imkanlar belə əlçatmaz olub.
Matçın baş hakimi Rauf Cabbarov meydançanı təftiş etdikdən sonra oyunun təxirə salınması barədə qərar qəbul edib. Oyunun yeni tarixi ilə bağlı əlavə məlumat veriləcək”.
Elə həmin paylaşımın “şərh” bölməsində vaxtilə hakimliklə məşğul olmuş Ağahüseyn Əzizov bununla bağlı narazılığını bildirib:
“Oyunun təxirə salınması haqqında qərarı baş hakim vermir. Bu onun səlahiyyətində deyil. O, matçın nümayəndəsini meydanın və hava şəraitinin oyunun keçirilməsinə yararlı olmaması haqqında məruzə edir. Bundan sonra nümayəndə qərar verir”.
Ağahüseyn bəy “Football-plus.az”a da belə dedi:
“Baş hakim özbaşına qərar vermir. O, hakim-inspektora məlumat verir. Sonra oyunun nümayəndəsinə məlumat verilir. Nümayəndə də futbol qurumuyla məsləhətləşib qərar verir. Hakim mövcud durum və matçın keçirilə bilməyəcəyi haqqında faktları nümayəndəyə ötürür. Qalan məsələlər ona aid deyil”.
ƏSƏD SEYİDOV
Digər xəbərlər
