''Qalatasaray'' bu gün Avropa Liqasının pley-offunun cavab oyununda ''Alkmaar''ı qəbul edəcək.

Hazırda İstanbulda hava futbol üçün heç də əlverişli deyil. Sibirdən gələn soyuq hava kütləsi və Altay qar fırtınası çərşənbə günü səhər saatlarından etibarən İstanbulu ağuşuna alıb. Bu cür havanın hələ ən azı 3 gün davam edəcəyi, bəzi yerlərdə qarın hündürlüyünün 40 santimetrə çatacağı gözlənilir.

Əlverişsiz hava şəraiti həm bu günkü ''Qalatasaray'' - ''Alkmaar'', həm də bazar ertəsi oynanılması planlaşdırılan ''Qalatasaray'' - ''Fənərbaxça'' derbisinin keçirilməsinə mane ola bilər. Hər halda Türkiyə mətbuatında hər iki matçın da təxirə salınması ehtimalının olduğu qeyd olunub. Ancaq digər tərəfdən ''Qalatasaray'' bu günkü oyunun keçirilməsi üçün əlindən gələni edir. Ot örtüyü dünən axşam saatlarından etibarən örtülüb. Qar təmizləyən maşınlar meydanın kənarına gətirilib. Stadionun isitmə sistemi də artıq qoşulub.

Derbinin taleyi böyük ehtimalla bu günkü oyundan asılıdı. Bu günkü oyun təxirə salınsa, derbi də təxirə salınacaq.

ƏLİ