“Milan”ın Çempionlar Liqasında (ÇL) mübarizəni dayandırması rəhbərliyi qəzəbləndirib. Bu barədə insayder Nikolo Skira məlumat yayıb.

"Football-plus.az" xəbər verir ki, İtaliya klubu pley-offun ilk oyununda “Feyenoord”a uduzub (0:1), cavab görüşündə isə heç-heçə qeydə alınıb (1:1).

Nəticədə “Milan” turnirlə vidalaşıb. Klub rəhbərliyini xüsusilə də sol cinah müdafiəçisi Teo Ernandesin oyunu məyus edib. O, cavab oyununda “Milan” 1:0 hesabı ilə öndə olarkən qırmızı vərəqə alıb. Sonra isə “Feyenoord” hesabı bərabərləşdirib. Fransalı futbolçu bu səbəbdən cərimələnə bilər.

Rəhbərlik baş məşqçi Serjio Konseysaonun da fəaliyyətindən narazıdı. Komandaya ötən ilin dekabrında istefaya göndərilən Paulu Fonsekanın yerinə təyinat alan portuqaliyalı mövsümün sonunda işini itirə bilər. “Milan Press”in yaydığı xəbərdə rəhbərliyin artıq Mauritsio Sarri ilə danışıq apardığı bildirilir.

Hazırda işsiz olan 66 yaşlı italiyalı mütəxəssis yeni mövsümdən “Milan”ı çalışdıra bilər. Xəbərdə qeyd edilib ki, komandanın ÇL-də mübarizəni dayandırması klubda Konseysao ilə müqaviləni pozmaq zərurətini oyadıb.

Yeri gəlmişkən, “Milan”ın İtaliya çempionatındakı çıxışı da qənaətbəxş deyil. Komanda hazırda 24 oyuna 41 xalla 7-ci yerdədi. Milanlıların ehtiyatda “Bolonya” ilə təxirə salınan oyununun olduğunu da qeyd edək.