Bentaleb yaşıl meydana döndü - əlcəzairli yarımmüdafiəçi iyunda ürəktutması keçirmişdi
Cümə axşamı – fevralın 13-də “Lill” sosial şəbəkələrdə Nabil Bentalebin videosunu yaydı. Yarımmüdafiəçi yarım il əvvəl ürəktutması keçirmişdi. Məşqdən əvvəl əsas və əvəzedici heyətin futbolçuları, həmçinin klub əməkdaşları onun üçün şərəf dəhlizi yaratdı.
"Football-plus.az" xatırladır ki, “Lill”in ötən il iyunun 18-də yaydığı açıqlamada deyilirdi:
məşqdə özünü pis hiss edən futbolçu universitet xəstəxanasına çatdırılıb, müayinə bir neçə gün davam edəcək. Bir həftə sonra yeni açıqlama verildi: tibbi müayinə gözləniləndən daha yaxşı nəticə verir, yarımmüdafiəçi tezliklə evə buraxılacaq.
“Lill” onda detalları açıqlamasa da, “RMC Sport” yazırdı ki, futbolçu ürəyi dayandığına görə xəstəxanaya aparılıb. İlk yardım briqadası defibrillyatordan yararlanıb, onun ürəyini masaj edib. Nabili süni koma vəziyyətinə salan həkimlər uğurlu əməliyyat keçirdilər. Futbolçunun orqanizminə ürək fəaliyyətini tənzimləmək üçün kardiostimulyator qoyuldu.
Cərrahi müdaxilədən sonra Fransa Futbol Federasiyasının tibb komissiyasının qarşısında bir sual dayanırdı: Nabilin idmana dönüşünə icazə vermək olarmı? Bentaleb təslim olmadı və uzun bərpa prosesi keçdi.
Əslində futbolçunun ürəyində problem olduğunu “Lill” əvvəldən bilirdi. Hətta onun 2022-də “Anje”dən “şimallı itlər”in düşərgəsinə gəlişi zamanı əlavə müayinəyə görə transfer bir neçə gün gecikdirildi. Klubun baş direktoru Olivye Letan onda belə demişdi:
“Əlavə testlərin nəticəsini gözləyirik. Elə məsələlər var ki, yalnız rəsmi tibb komissiyasının iştirakı ilə həll olunmalıdı”.
Təəssüf ki, son vaxtlar futbolda ürəkdayanması halları tez-tez baş verir. Kristian Eriksen ilə bağlı tarixçə hər kəsə məlumdu. 2021-ci il iyunun 12-də - Finlandiya ilə Avropa çempionatının oyununda danimarkalının ürəyi dayandı. Tam normal səviyyədə həyatına davam etmək üçün futbolçunun ürəyinə kardioverter-defibrillyator qoyuldu, 8 aydan sonra “Brentford” formasında meydana çıxdı.
Danimarkalı “İnter”də qala bilməzdi. Ona görə ki, A seriyasında futbolçuların orqanizmdə hər hansı başqa əşya ilə çıxış etməsinə imkan verməyən sərt qadağa var.
Ondan iki il əvvəl isə “Ayaks”ın müdafiəçisi Deyli Blind “Valensiya” ilə oyunda özünü pis hiss etdi. Başı gicəllənən futbolçu qazona yıxılsa da, sona qədər meydanda qaldı. Ardından niderlandlıda miokardit – ürək əzələsinin iltihabı aşkarlandı və ona dərialtı defibrillyator qoyuldu.
2020-nin fevralında müdafiəçi meydana qayıtdı: ölkə kubokunun 1/4 final mərhələsinin “Vitess” ilə oyununda oyundaşını əvəzlədi. Amma avqustda qurğu davam gətirmədi. “Herta” ilə oyunun 79-cu dəqiqəsində Deyli qəfil cərimə meydançasında yerə yıxıldı və meydanı yalnız həkimlərin və klub əməkdaşlarının köməyi ilə tərk etdi. Onda həkimlər problemi defibrillyatorun işi ilə bağladı, onu yenisi ilə əvəzlədi.
Yeri gəlmişkən, Nabilin meydana dönüşünün uğurlu olduğunu da xatırladaq. “Lill”in səfərdə “Renn”ə 2:0 hesabıyla qalib gəldiyi oyunda ilk qolu məhz o vurdu.
Digər xəbərlər
