"Futbolun İnkişaf Fondunun (FİF) köməyi ilə bizlə əməkdaşlıq etmək istəyən sponsorlar üçün "biznes-klub" layihəsi başladılıb. "Biznes-klub"a hələlik 3 şirkət qoşulub. Onlardan ikisi Bakıda, biri Zaqataladadı. Məhz yeni layihə çərçivəsində artıq stadionla bağlı icarə haqqının böyük hissəsi ödənilib, bundan sonra da ödəmələrdə problem yaşamamalıyıq. Amma "biznes-klub" ehtiyaclarımızı tam ödəyə bilmir. Bu layihəni genişləndirmək istəyirik. Əlavə şirkətlərlə də danışıqlar gedir. Yanvarda FİF-in təşkilatçılığıyla şirkətlərlə yığıncaq keçirəcəyik. Bundan başqa, bizə qayğı və dəstəyini əsirgəməyən Qurban Qurbanov və Aftandil Hacıyevlə də görüşlərimiz olub. Belə ki, “Qarabağ” Futbol Akademiyası ilə əməkdaşlıq etmək istəyirik. Akademiyanın əlaqələndiricisi Aftandil Hacıyevlə bir çox detalları müzakirə etmişik. İstəyirik “Qarabağ” Akademiyasının köməyi ilə Zaqatalada uşaq futbolunu inkişaf etdirək və istedadlı uşaqları, yeniyetmələri üzə çıxaraq. Bu işdə çox maraqlıyıq. Amma hələlik həm FİF, həm də Ağdam təmsilçisinin rəsmiləri ilə danışıqlar mərhələsindəyik. Düşünürəm ki, hələ bir çox detalı saf-çürük etməliyik. İnanıram ki, 2024-cü il klubumuz üçün uğurlu olacaq".