İndi futbol ictimaiyyətini, xüsusilə "Neftçi" azarkeşlərini düşündürən məqam budu: deyəsən, "Neftçi" qayıdır!

Təbii ki, hələ "ağ-qaralar"ın bütün problemləri aradan qalxmayıb. Bu üzdən tərəfdarlar sidqi-ürəkdən sevinə bilmir. Mövcud durum gələcəklə bağlı yalnız ümid verir. "Neftçi"nin ölkə futbolundakı çəkisini nəzərə alsaq, heyətə cəlb edilən oyunçular haqda daha detallı məlumata ehtiyac var. Bu baxımdan diqqəti çəkən növbəti transfer Bassala Sambudu. Bəli-bəli, söhbət "Neftçi"nin yeni oyunçusundan gedir. Seneqal əsilli ingiltərəli hücumçunun son klubu Cənubi Kipr "Paralimni"si olub. 9 nömrəli formanı geyəcək 27 yaşlı futbolçuyla ilyarımlıq müqavilə bağlanıb. Təbii ki, hansısa futbolçu vaxtilə əfsanəvi Anatoli Banişevskinin daşıdığı formanı geyəcəksə, buna uyğun davranmalı, həmin köynəyi qol sevinclərinin axıtdığı tərlə islatmalıdı. Başqa cür ola bilməz. Bəs, Sambu bunu bacara biləcəkmi?

Maraq üçün qeyd edək ki, karyerasına İngiltərədə başlayan Sambu "Koventri"nin yetirməsidi. O, 2017 və 2019-cu illərdə "Everton"la 23 yaşadək futbolçular arasında keçirilən İngiltərə premyer-liqasının çempionu olub. Ölkə xaricində 2021-ci ildə icarə əsasında oynadığı "Randers"lə Danimarka kubokunu qazanıb. O, bu mövsüm 21 matça çıxaraq 5 qol, 1 məhsuldar ötürmə ilə yadda qalıb. Mərkəz hücumçusu kimi effektiv çıxışla diqqəti çəkən oyunçu sağ və sol cinahlarda da fərqlənmək qabiliyyətinə malikdi. "Transfermarkt"a görə, Sambunun qiyməti 175 min avrodu. Elə bu statistika portalı "Neftçi"nin transferi reallaşdırmaq üçün "Paralimni"yə 100 min avro təzminat ödədiyini qeyd edib. Bu məlumatı Cənubi Kipr mətbuatı da təsdiqləyib. Sambunun ən yüksək bazar dəyəri 2021-ci ildə qeydə alınıb. Həmin dövrdə "Fortuna Sittard"da (Niderland) top qovan futbolçunun qiyməti 300 min avroya çatıb. Hücumçu indiyə qədər "Oldhem" və "Aleksandra"nın da (hər ikisi İngiltərə) formasını geyib.

Deməli, paytaxt təmsilçisinin işıqlı günlərə qədəm qoymaq ehtimalı böyükdü. Təbii ki, Sambu başda olmaqla yeni simalar özünü yaxşı tərəfdən göstərə bilsə...

KƏNAN BAHADIR