''Mən ''Fənərbaxça''lıyam və orda oynamaq mənim arzum idi. O da karyeramın sonuna yaxın reallaşdı. ''Qalatasaray''ı da son illərdə sərgilədiyi futbola görə təbrik edirəm. Arda Gülər və Kənan Yıldız kimi istedadlarımıza sahib çıxmalıyıq. Pis də oynasalar, yaxşı da oynasalar, arxalarında millətin dəstəyini hiss etsələr, bacarmayacaqları şey yoxdu. Yığma seçimi mövzusunda çox danışmaq istəmirəm. Yalnız onu deyə bilərəm ki, hər şey anladıldığı kimi deyil. O dönəmdə çox fərqli şeylər oldu. Keçmişdəki mövzuları bu gün yenidən gündəmə gətirmək istəmirəm. Amma durum heç də bəzi insanların dediyi kimi olmadı. Babam Almaniyaya ilk gedən türklərdən olub. Yeni ölkə, dil yox, ailə yox, pul yox... Tək başına çalışırsan və bir küncə sıxışırsan. Sonra övladlarını da yanına gətirir və onlar da böyüyərək ailə sahibi olurlar. Əsil işçi ailəsi idi. Dil ilə bağlı çox ciddi çətinliklər yaşayıb. Amma biz heç vaxt və heç bir yerdə türk olduğumuzu gizlətmədik. İndi futbol izlədikdə çox da zövq almadığım bir dönəmdəyəm. Mənim dönəmimdə çox böyük isimlər var idi. İndi Arda Güləri izlədikdə onu özümə bənzədirəm. Açığı, karyeramı ''Fənərbaxça''da bitirmək istəyirdim. O kluba da məhz bir neçə il oynayıb vida matçımı keçirmək üçün gəlmişdim. Amma buna imkan vermədilər. Sonra ''İstanbul BŞ''yə yollandım və ardından ikinci övladım dünyaya gəldi. Məhz həmin an futbolla vidalaşmaq qərarına gəldim. Bu addıma görə peşman deyiləm. Hüzur və xoşbəxtliyi tapmaq üçün karyeramı bitirdim. Yaxşı ki də bitirmişəm. Çünki hüzur və xoşbəxtliyi tapa bildim. Oyunçu olaraq çəkindiyim biri yox idi. Amma komanda olaraq ''Barselona''ya qarşı oynamaq çox çətin idi.

2010-cu ildə ''Real'' ilə müqavilə imzaladıqdan bir neçə ay sonra səfərdə ''Barsa''ya qarşı oynadıq. 0:5 məğlub olduq və oyunboyu bizə topu vermədilər. Paltardəyişmə otağında Joze Mourinyonun hər birimizə əsəbləşəcəyini düşünürdük. Düzdü, əsəbi idi, amma fərqli cür danışdı. Hər kəsin çiyninə vuraraq bizi ruhlandırmağa çalışdı. ''Üzünüzü qaldırın. Uduzacağınızı bilirdim. Mənim adım Joze Mourinyodu və sizə söz verirəm ki, ikinci mövsüm bunları əzib keçəcəyik'' dedi və belə də oldu. İnşallah bunu bu mövsüm ''Fənərbaxça''da da edər. Türkiyədəki hakimlər üçün çox üzülürəm. Həqiqətən də işləri çox çətindi. Futbolda hər iki tərəfi də məmnun etmək mümkün deyil. Çünki iki tərəfdən biri uduzur. Allah hakimlərimizə səbr versin. Bizim millət bəzən ən asan yolu seçir. Uduzan tərəf günahı hakimdə görür. Avropada artıq sistem elə oturub ki, böyük klublar hakimlərə rəğmən qalib gəlir. İnsan öncə özünü günahlandırmalıdı. Yalnız hakimdə günah görmək düzgün yanaşma deyil. Çünki hakimlər də insandı və səhvə yol vermələri mümkündü. 2010-da ''Real''a yollanmamışdan öncə mənə PSJ də, ''Bavariya'' da təklif göndərmişdi. Sonra Arsen Vengerdən zəng gəldi. Ona artıq ''Real'' ilə anlaşdığımı dedim. Amma bir gün Madriddən ayrılsam, ''Arsenal''a gələcəyimi dedim. Sonda belə də oldu''.