Moskva “Dinamo”su Bakıda futbol məktəbi açdı
Son illərdə Avropanın bir çox aparıcı klubu Bakıda özünün futbol məktəbini açıb.
Bazar günü onların sırasına Moskva “Dinamo”su da qoşulub. Rusiyanın ən məşhur klublarından birinin uşaq futbol məktəbi Azərbaycan paytaxtında rəsmi fəaliyyətə başlayıb. Bununla bağlı tədbir Bakı Olimpiya Stadionunun ərazisində yerləşən “Sporster Football Grounds”da keçirilib. Bu, Moskva klubunun “Laçın” Futbol Akademiyası ilə birgə layihəsidi. Açılış mərasimində “Laçın” Futbol Akademiyasının direktoru və təsisçisi Pərviz Ağayevin dəvəti ilə FİFA agenti Əsgər Cəfərzadə də iştirak edib.
Əsgər bəy "Football-plus.az"a tədbirlə bağlı bunları dedi:
“Ümid edirəm ki, Moskva “Dinamo”sunun Futbol Akademiyasının Azərbaycana qədəm qoyması ölkəmizdə uşaqların futbol istedadını kəşf etməyə və onların uğurlu inkişafına təkan olacaq. Avropanın müxtəlif klublarının Azərbaycanda bu yöndə iş qurması həm də rəqabət mühiti yaradacaq”.
Xatırladaq ki, “Dinamo” Rusiya, Qazaxıstan, Özbəkistan, Belarus və Azərbaycanda ümumilikdə 130 məktəb açıb, bu məktəblərdə 5 minə yaxın uşaq futbolun sirlərini öyrənir.
ORXAN
