“Sky Sport” bu həftə maraqlı bir xəbər yayıb.

İngiltərə premyer-liqasının (İPL) rəhbərliyi futbolçuların qolu qeyd etməsini nəzarətdə saxlamağı, alçaldıcı və ya istehzalı jestə əl atanları cəzalandırmağı planlaşdırır. Bu qərar son vaxtlarda İngiltərə futbolunda baş verən bəzi qalmaqallara cavab xarakteri daşıyır.

İPL-in baş futbol zabiti Toni Skoulzun fikirləri:

Doğrudan da, son vaxtlar premyer-liqada qolu təhqiramiz şəkildə bayram etmək epidemiya xarakteri alıb, belə halların sayı əməllicə artıb. Məsələn, yanvarın 25-də keçirilən “Brayton” - “Everton” oyununda (0:1) yeganə qolu penaltidən vuran Lliman Ndiaye əli ilə rəqibin rəmzi olan qağayını təsvir etdi və hakim buna görə onu sarı vərəqə ilə cəzalandırdı.

“Mançester Siti”nin hücumçusu Fil Foden və onun “Mançester Yunayted”dən olan rəqibi Coşua Zirkzee da bu mövsüm cəzalanıb – qolu bayram edərkən atəş açmağı imitasiya etdiklərinə görə. Bəzi fanatlar belə davranışı təhqiramiz sayır.

İngiltərə mətbuatına inansaq, futbol məmurlarının səbr kasasını daşıran son damla “Arsenal”ın 18 yaşlı yarımmüdafiəçisi Maylz Lüis-Skellinin hərəkəti olub. “Topçular”ın bir neçə gün əvvəl “Siti”ni darmadağın etdiyi (5:1) oyunda Lüis-Skelli komandasının 3-cü qolunu vurub və gerçəkdən sırtıqcasına davranıb: Holannın gözü önündə onun kimi meditasiya edib. Bu aksiya norveçli ulduzun sentyabrdakı davranışına cavab olub – onda komandalar 2:2 oynamış, “şəhərlilər”in forvardı isə Maylzdan saymazyana şəkildə kim olduğunu soruşmuşdu.

Maylzın qolu qeyd etməsi ilə bağlı bütün İngiltərə danışdı – çoxları yarımmüdafiəçinin hərəkətinə heyranlıq duysa da, başqaları da mühakimə etdi. Sonuncular sırasında məşhur futbol veteranı Ceymi Karrager də var:


İngiltərə tabloidləri dərhal İngiltərə futbolunun əsas trolu – “Lester”in kapitanı Ceymi Vardinin taleyinə görə narahat olmağa başladı. Başqa futbolçular qolu bayram edərkən əcaib jestlərə bəlkə də karyerası boyunca bir neçə dəfə əl atıb. 38 yaşlı forvard isə hər mövsüm hoqqabazlıq edir. Bu mövsüm də istisna deyil.

Xatırlamağa dəyər. “Tottenhem”lə oyunda fərqlənən Vardi əvəzlənərkən “mahmızlar”a onların qənimət otağının boş olduğunu xatırlatdı. Ceymi əvvəlcə futbolkasındakı premyer-liqa loqosunu göstərdi, sonra londonlu azarkeşlərə üz tutdu və barmaqları ilə “sıfır” işarə etdi. Təəccüblüdü, ancaq Vardi yanvardakı qarşılaşmada da eyni tryuku təkrarladı – qol vurandan sonra “sıfır” göstərdi. Ancaq bu dəfə hər şey “Tottenhem”in arenasında baş verdiyindən reaksiya daha canlı oldu.

2022-ci ildə Ceymi “Vulverhempton”u bezdirdi. Sonradan meydana çıxan (deyilənə görə, enerjili içkiləri qəbul edəndən sonra) hücumçu qol vurandan sonra “canavarlar”ın tribunalarına tərəf qaçaraq təhqiramiz sözlər qışqırdı. Bu hadisədən üç il əvvəl isə “Kristal Pelas” azarkeşlərini aşağılamışdı – qoldan sonra qartalı təsvir etmişdi.

İPL rəhbərliyi həqiqətən qolu əcaib şəkildə qeyd etməyə görə cəza mexanizmini işə salsa, məhz Vardi ən böyük zərərçəkən olacaq. Ya da ipə-sapa yatacaq, davranışını düzəldəcək. Hərçənd buna inanmaq çox çətindi.