Belçika Kral Futbol Assosiasiyası yanvarın 17-də Domeniko Tedeskonun yığmadan ayrıldığını elan etdi. Bir həftə sonra isə “qırmızı iblislər” üçün yeni çalışdırıcı tapıldı. Onlara bundan sonra Rudi Qarsiya rəhbərlik edəcək.

60 yaşlı fransalı məşqçi təcrübəli mütəxəssisdi, baxmayaraq ki, onun adından sonra “uğurlu” təyinini yazmaq çətindi. Qarsiya uzun karyerası boyunca müxtəlif klublarda çalışıb. Ölkəsində “Lill”, “Lion” və “Marsel”in, vətəndən kənarda isə “Roma”, “Napoli” və “Əl-Nəssr”in “sükanı arxasında” olub.
Son illərdə onun işləri qaydasında getməyib. Çətin ki, Qarsiya Səudiyyə Ərəbistanında Ronaldo ilə işbirliyindən razı qala – şayiələrə inansaq, məhz portuqaliyalı ulduz fransalı mütəxəssisin qovulmasına səbəbkar olub. Nə qədər qəribə görünsə də, Kriştiano həmin vaxt hələ bir neçə ay idi bu ölkəyə qədəm qoymuşdu, ancaq Rudi ilə münasibətləri necə pozuldusa, onu sıxışdırdı.

“Napoli”də də mütəxəssisin karyerası alınmadı – Qarsiya qısa müddət çalışdı, klubun sahibi Aurelio de Laurentis onu əməllicə aşağıladı. Məsələn, məğlubiyyətlərin birindən sonra boss mediaya belə demişdi: “Rudi üçün yaxşı məqam deyil. İtaliyanı tanımayan adamı gətirmisizsə, belə hallar olur. Lazımi anda ən yaxşı qərarı verəcəm”. Prezidentin dediyi lazımi an bir ay sonra yetişdi – 2023-ün noyabrının sonunda Qarsiya qovuldu.

O vaxtdan bəri işsiz idi. Və indi Belçika yığması vasitəsi ilə sevimli peşəyə qayıdır. Özü də bu komanda üçün çox önəmli məqamda. “Qırmızı iblislər” Millətlər Liqası çərçivəsində Ukrayna ilə iki oyun keçirməlidi. Ardından dünya çempionatının seçmə mərhələsi gəlir. Yeni baş məşqçiyə uğur arzulamaq lazımdı.

Həmin uğur əvvəlki çalışdırıcıdan – Domeniko Tedeskodan yan keçdi. Yığma onun rəhbərliyi altında 14 oyunluq məğlubiyyəsiz seriya yaxalasa da, 2024-ün yayında – qitə birinciliyində iflasa uğradı. Elə Millətlər Liqasındakı çıxış da uğursuz oldu. Komanda Fransa, İtaliya və İsrailin olduğu qrupda yalnız bir qələbə qazana bildi. Hələ baş məşqçinin yığmanın əsas ulduzu – “Real”ın şərəfini qoruyan Tibo Kurtua ilə yersiz və anlaşılmaz münaqişəsini demirik.
Bütün bunlara baxmayaraq, yerli futbol qurumu almaniyalı mütəxəssislə “isti” vidalaşdı, ona uğur arzuladı. Tedesko yığmanı 2023-ün fevralından bəri çalışdırırdı. “Qırmızı iblislər” onun rəhbərliyi altında keçirdiyi oyunların 12-də qələbə qazandı, 6-da uduzdu, 6-da da heç-heçə etdi.