Raca Naynqqolan saxlanılıb. Belçika yığmasının sabiq oyunçusu narkotik maddələrin alverində şübhəli bilinir.

Brüssel Şəhər Prokurorluğu onun bu səbəbdən saxlanılmasına qərar verib. Hüquq-mühafizə orqanları Cənubi Amerikadan Belçikanın Antverpen port şəhərinə narkotiklərin daşınması ilə bağlı cinayət hadisəsini araşdırır. Böyük istintaq prosesi və şübhəlilərin dindirilməsi başlayıb.

İddiaya görə, Naynqqolan Amerikadan Avropaya kokain daşınmasında vasitəçi kimi çıxış edib. Hüquq-mühafizə orqanları hələ ki yalnız şübhəli şəxs kimi saxlanılanlar haqqında əlavə heç bir məlumat verməyi lazım bilmir.

Yeri gəlmişkən, 36 yaşlı yarımmüdafiəçi bir neçə gün əvvəl Belçika çempionatının 2-ci divizionunda çıxış edən “Lokeren-Temse” klubu ilə müqavilə başlamışdı. Belçika yığmasında 30 oyuna 6 qol vuran Raca İtaliyada “Pyaçentsa”, “Kalyari”, “Roma”, “İnter”, SPAL, Belçikada “Antverp”, İndoneziyada isə “Bhayanqkara”nın formasını daşıyıb.