Təəssüf, təəssüf, təəssüf... “Qarabağ”ın bu gün Avropa Liqasının 7-ci turunda FKSB-ni qəbul edəcəyi matç üçün satılan biletlərin sayını eşidərkən keçirdiyim hissi başqa sözlə ifadə edə bilmirəm...

Cəmi 15 min bilet...

Azərbaycan çempionu “Lion”a uduzanda qələmə aldığım “Qarabağ həm meydanda “qan itirir”, həm də tribunada” sərlövhəli yazıda qeyd etmişdim ki, avrokuboklardakı rəqiblərlə ayaqlaşa bilmək üçün həm də azarkeş sayının çoxluğu önəmlidi. “Qarabağ”ı geridə qalan 6 matçdan cəmi birində qələbə qazandığı üçün cəzalandırmaq fikrinə düşməyin! Bəli, yuxarıda bəhs etdiyim yazıda vaxtilə “elin gözü tərəzidi” deməklə ağdamlıların indiyə qədər buraxdığı səhvləri və uğursuzluqlarını doğru dəyərləndirdiyinizə əminliyimi ifadə etmişdim. Haqlısız. “Qarabağ”ın artıq Juninyosu yoxdu, “Qarabağ” avrokuboklarda qələbələri sıralamır, “Qarabağ”ın xeyli futbolçusu ötənilki performansından uzaqdı.

Ümumiyyətlə, “Qarabağ” avrokubokların yeni formatına uyğunlaşmaqda ciddi çətinliklə üzləşdi. Bəlkə də problemlər bununla bitmir. Yaddaşımızı işə salsaq, daha bir neçə çatışmazlıqdan bəhs etmək olar. Amma...

Əziz azarkeşlər, sizin “Qarabağ”a vəfa borcunuz var! Komanda bu gün məğlub olsa, Avropa Liqasının pley-off mərhələsinə vəsiqə qazanmaq şansını itirəcək. Ona görə ki, 24-cü pillədə qərarlaşan “Elfsborq”un 7, bizimkilərin isə cəmi 3 xalı var... “Köhlən atlar” bu gün “ölüm-qalım” savaşına çıxacaq. Axı illərdi ki, Avropa meydanlarında sinəmizi qürur hissiylə qabardan “köhlən atlar” yarıboş tribunalar önündə meydana çıxmağa layiq deyil! Bu gün tərəzinin bir gözündə “Qarabağ”, digərində özündənrazı FKSB var. Bir gözündə pley-off şansı, digərində isə mübarizəni dayandırmaq var. Qurban Qurbanovu və komandasını tribunalardan dəstəkləyib-dəstəkləməyəcəyiniz haqda bir daha düşünün. Seçiminiz “Qarabağ” olsa, biletlər sizi gözləyir! Bugünə qədər qazanılan tarixi uğurların eşqinə... Ardıcıl 11 dəfə avrokuboklarda qrupa düşməyin eşqinə...

KƏNAN BAHADIR