MHL-də Milad təntənəsi yaşanır. Bu üzdən yalnız dekabrın 24-də komandalar buz üzərinə çıxdı.

"Football-plus az" xəbər verir ki, “Pittsburq”un evdə “Filadelfiya”nı 7:3 hesabıyla məğlub etdiyi oyunda “pinqvinlər”in heyətində Sidni Krosbi 4 (1+3) xal topladı. Karyerasında 1033-cü məhsuldar ötürməni verən kanadalı ulduz klubun rekordçusu Mario Lemyeyə (915 oyunda 1033 ötürmə) çatdı. Sadəcə, Krosbi bunu 1308-ci oyunda bacardı.

Lemye ilə Krosbi MHL tarixinin assistentləri siyahısında 12-ci yeri bölüşür. Yuxarı pillələrdə isə Ueyn Qretski (1963), Ron Frensis (1249), Mark Messye (1193), Rey Burk (1169), Yaromir Yaqr (1155), Pol Koffi (1135), Co Tornton (1109), Adam Outs (1079), Stiv Ayzerman (1063), Qordi Hou (1049) və Marsel Dionn (1040) qərarlaşıb.

“Veqas” da həmin gün “Anahaym”ı 3:1 hesabıyla məğlub etdi. “Qolden Nayts”ın baş məşqçisi Bryus Kessidi 119-cu qələbəsini qazanmaqla bu göstəricidə yeni klub rekordu müəyyənləşdirdi. O, 2008-20-ci illər aralığında “Veqas”ın “sükanı arxasında” olan Jerar Qallanı (118) arxada qoydu. Kessidinin 2022-ci ilin iyunundan bəri bu komandanı çalışdırdığını da xatırladaq.

Bu arada “Detroyt” Todd Maklellanın baş məşqçi postuna təyin olunduğunu elan edib. O, bu vəzifədə 2022-nin yayından iş başında olan Derek Lalondu əvəzləyib. Maklellanın son komandası isə 2019-un aprelindən bu ilin fevralına qədər çalışdırdığı “Los-Anceles” olub. “Kinqz” onun rəhbərliyi altında iki dəfə pley-offun 1-ci mərhələsində mübarizəni dayandırıb, daha iki dəfə Stenli kubokuna vəsiqə qazana bilməyib. “Detroyt” isə 34 oyundan sonra cəmi 30 xal toplamaqla Qərb konfransında sonuncudan əvvəlki - 15-ci yerdə qərarlaşıb.

24 dekabr
Toronto – Vinnipeq 2:5 (0:1, 1:1, 1:3)
Boston – Vaşinqton 4:1 (1:0, 0:1, 3:0)
Kolambus – Monreal 5:4 (2:0, 1:3, 2:1)
Detroyt – Sent-Luis 0:4 (0:1, 0:2, 0:1)
Florida – Tampa-Bey 0:4 (0:3, 0:0, 0:1)
Pittsburq – Filadelfiya 7:3 (4:1, 1:2, 2:0)
Aylenders – Baffalo 1:7 (0:2, 1:3, 0:2
Minnesota – Çikaqo 4:3 (1:1, 1:1, 2:1)
Neşvill – Karolina 5:2 (1:0, 1:0, 3:2)
Yuta – Dallas 2:3 (1:1, 0:2, 1:0)
Vankuver – San-Xose 4:3 (1:1, 3:0, 0:2)
Veqas – Anahaym 3:1 (1:0, 0:0, 2:1)