2025-ci ildə Avropa futbolunda maraqların münaqişəsi fonunda vəziyyətin bir qədər də mürəkkəbləşəcəyi gözlənilir. Səbəb sadədi: UEFA ilə Avropa Superliqasının təsisçiləri və tərəfdarları arasındakı münasibətlərin daha da gərginləşmək ehtimalı çoxdu.

Əvvəla Avropa Superliqası layihəsinin adının dəyişdirildiyini bildirək. İngiltərədə çıxan “The Telegraph” qəzetinin yaydığı məlumatda turniri təşkil etməyi planlaşdıran “A22” şirkətinin bu barədə bəyanat verdiyi bildirilib. Hələlik bir oyunu belə keçirilməyən yeni turnirin adı Birlik Liqasına (ingiliscə Unify League) dəyişdirilib. “A22”nin bəyanatında UEFA-dan yarışın təşkili üçün icazə istəniləcəyi bildirib. Superliqanın tərəfdarları hesab edirlər ki, UEFA Avropa Məhkəməsinin 2023-cü ilin dekabrında çıxardığı qərara uyğun olaraq bunu etməyə borcludu. Xatırladaq ki, bu məhkəmə keçən il dekabrın 21-də FİFA və UEFA-nın klubların Superliqada iştirakına qadağa qoymasını qeyri-qanuni elan edib, ali futbol təşkilatlarının qərarlarının Avropa qanunlarına zidd olduğunu vurğulayıb. Lakin UEFA-nın buna reaksiyası mənfi olmuşdu: qitə futbol qurumu bəyanat yayaraq məhkəmənin qərarının Superliqanın təsdiqi anlamına gəlmədiyini qeyd etmişdi.

Təşkilatçılar yeni turnirə 2025-ci ilin payızında start vermək istəyirlər. Reqlamentə əsasən, yarış 3 divizion olmaqla 4 liqada (Ulduzlar Liqası, Qızıl Liqa, Mavi Liqa, Birləşmiş Liqa) təşkil olunacaq və turnirdə ümumilikdə 96 klub çıxış edəcək. İlk divizionda 32 komanda (hər birində 16 klub olmaqla iki qrupa bölünür) olacaq. Elə digər liqaların hər birində də 32 komanda mübarizə aparacaq. Hər diviziondan 2 komanda olmaqla ümumilikdə 8 komanda 1/4 finala yüksələcək. Bu mərhələ iki, yarımfinal və final isə bir matçdan ibarət olacaq. Yarımfinal və final oyunları neytral meydanda təşkil ediləcək.

Turnir təşkilatçı şirkətin vahid platforması vasitəsilə “Netflix”ə bənzər modelə malik proqram əsasında yayınlanacaq. Abunəçilər nisbətən yüksək səviyyəli reklam məzmunlu oyunlara pulsuz baxa və ya reklamı aradan qaldıran abunə haqqı ödəyə biləcəklər.

Bir maraqlı məqamı da qeyd edək. Rusiya klubları üçün beynəlxalq turnirdə oynamaq fürsəti yaranıb. “A22”nin məlumatında yeni formata əsasən, turnirdə 55 ölkədən 96 klubun iştirak edə biləcəyi göstərilib. Bu, UEFA-nın üzvü olan ölkələrin sayına bərabərdi. Bu ölkələrin siyahısında Rusiyanın da adı var. Bilindiyi kimi, FİFA və UEFA Rusiya - Ukrayna müharibəsinə görə Rusiya komandalarının öz turnirlərində iştirakına qadağa qoyub.