''Fənərbaxça''da yavaş-yavaş oxlar Joze Mourinyoya yönəlməyə başlayır. Çünki komanda göz görə-görə çempionluq yarışında əzəli rəqibi ''Qalatasaray''ı artıq çox irəli buraxıb. 17-ci turdan sonra xal fərqi 8-ə yüksələ bilər.

''Eyüpspor''a qarşı son matçın (1:1) ardından bu mövsüm ilk dəfə fanatlar portuqaliyalı mütəxəssisi istefaya dəvət etdi. Elə rəhbərlik səviyyəsində də toplantı keçirildi və komandanın durumu müzakirə olundu. Düzdü, həmin toplantıda Mourinyonun istefası ümumiyyətlə gündəmə gətirilmədi. Amma rəhbərliyin bu məşqçidən nəticələrin pisləşməsi ilə bağlı bir raport tələb edəcəyi gözlənilir.

Xəbər verdiyimiz kimi Mourinyo şənbə günü əməliyyat olunmaq üçün İstanbulu tərk etdi və oyunçulara 6 günlük istirahət verdi. 61 yaşlı məşqçi bazar ertəsi öd kisəsindən əməliyyat olunacaq. O, İstanbula cümə axşamı qayıdacaq və cümə günü dekabrın 27-də komandanı məşqə çıxaracaq. Mourinyo ''sarı-lacivərdlilər''in başında 7-ci ayını tamamlamaq üzrədi. Ona yönələn əsas tənqidlər bunlardı.

1. Sistem oturmayıb. ''Fənərbaxça'' bu mövsüm Mourinyo ilə artıq 26 rəsmi oyuna çıxıb. Ünlü mütəxəssis hələ də istədiyi sistemi komandaya aşılaya bilməyib. ''Fənər'' nə hücumda ideal görünür, nə də müdafiədə.

2. İdeal ''11-liy''in olmaması. İlk dövrə başa çatmaq üzrə olsa da, Mourinyonun hələ də ideal ''11-liy''i yoxdu. Düzdü, Tadiç, Şimanski, Amrabat və Livakoviç əsas heyətin vazkeçilməz üzvləridi. Amma digər oyunçular gah start heyətində meydana çıxırlar, gah da ehtiyatda qalırlar. Mourinyoya istədiyi sistemi oturtmağa mane olan məqamlardan biri də məhz budu.

3. Ulduzlar geriləyib. Ötən il komandanın ulduzu olanlardan yalnız Ceko ilə Tadiçin az-çox səviyyəsini qoruduğunu söyləmək olar. İrfan Can Kahveci ilə Şimanski başda olmaqla digərləri isə geriləyib. İrfan Can ötən mövsüm karyerasının ən uğurlu dönəmini keçirmişdi. Amma Mourinyo ondan faydalana bilmir. Sağ vinger mövqeyində əsasən Tadiç oynadığından İrfan tez-tez ehtiyatda qalır. Halbuki Tadiçin əsil mövqeyi sol cinahdı. Çoxsaylı tənqidlərə baxmayaraq Mourinyo bu durumu dəyişmək istəmir. Şimanskinin də faydalılığı aşağı düşüb. Amma onun müdafiəyə yardım etmək özəlliyi üzündən Mourinyo daim polşalıya start heyətində şans verir.

4. İstədiyi oyunçuların hamısı alınıb. Transfer baxımından Mourinyonun şikayət etməyə qətiyyən haqqı yoxdu. Camiədə ''Mourinyo kimi istədisə, hamısı alındı'' fikri hakimdi. Bu fikirlə razılaşmamaq çətindi. Amma yeni transferlərin faydalılığı istənilən səviyyədə deyil. Ən-Nəsiri son vaxtlar məhsuldarlığını bir qədər artırsa da, onun adaptasiya dönəmi çox uzun çəkdi. Yüksək məbləğ qarşılığında icarəyə götürülən Sen-Maksimen isə açıq aşkar ümidləri doğrultmur. Son oyunlarda o hətta start heyətindəki yerini Oğuz Aydına verməli olub.

5. Avrokubokların iştirak ərizəsi düzgün planlaşdırılmayıb. Türkiyə çempionatı ilə yanaşı avrokuboklara verilən iştirak ərizəsi də ''Fənər''in başına bəla oldu. Məsələn, müdafiənin solunda oynamağa oyunçu qalmayıb. Oostervolde zədə üzündən mövsümü başa vurubsa, o cinahda oynaya bilən 3 futbolçu - Kostiç, Levent Mercan və Oğuz Aydından heç birinin adı iştirak ərizəsinə salınmayıb! O mövqedə avrokuboklarda məcburi olaraq əsil mövqeyi sağ cinah olan Mərt Müldür oynayır.

6. İddialı rəqiblərlə görüşlərdə uğursuzluq. Joze Mourinyo ''Fənərbaxça''da köməkçiləri ilə birlikdə illik 14 milyon avro qazanır. Ona bu məbləğ yalnız Anadolu klublarını məğlub etsin deyə verilmir. Anadolu klublarını ''Fənər'' zatən məşqçisiz də məğlub edə bilər. Mourinyo iddialı rəqiblərlə görüşlərdə səviyyəsini, ideyalarını göstərməlidi ki, hələlik bunu bacarmır.

Təsnifat mərhələsində ''Lill''ə uduzmaqla Çempionlar Liqasında mübarizəni erkən dayandıran komanda superliqada ilk ''6-lıq''da yer alan rəqiblərin heç birini məğlub edə bilməyib! Bura Avropa Liqasında ''Mançester Yunayted'', ''Tvente'', ''Alkmaar'', ''Atletik''lə oyunları da əlavə etmək olar. Faktiki olaraq ''Fənər'' ilk dövrədə çətin sayıla biləcək rəqiblərdən yalnız ''Slaviya''nı məğlub edib.

Bütün bu məqamlar təbii ki, rəhbərliyi də düşündürür və bu yanlışların düzəldilməsi üçün Mourinyoya xəbərdarlıq ediləcəyi gözlənilir.

ƏLİ