Son dönəmlərdə tanınmış futbolçuların dopinq testdə ilişməsi faktına heç də az rast gəlinmir.

Ötən il bu aqibətlə Pol Poqba üzləşmişdisə, son günlərdə bu baxımdan ''Çelsi''nin ukraynalı vingeri Mixail Mudrikin adı gündəmdən düşmür. Bu bəla Türkiyə futbolundan da yan ötməyib.

''Beşiktaş''ın yetirmələri olan və yaxın keçmişdə perspektivli hesab olunan iki futbolçunun başı çox ciddi bəlaya düşüb. Söhbət Əmirhan Delibaş və Berkay Vardardan gedir. Dekabrın 18-də insayder Yağız Sabuncuoğlu hər iki futbolçunun Türkiyə Futbol Federasiyası tərəfindən 4 illik cəza alması xəbərini Türkiyə futbol ictimaiyyətinə çatdırdı. Onların adi sinik analizində dopinqə rast gəlinibmiş. B analizi də müsbət çıxıb. Amma bu futbolçulardan nə vaxt analiz götürüldüyü, onlardan nə zaman və konkret hansı maddə tapıldığı haqda məlumat yoxdu. Adətən belə xəbərlər dərhal mətbuatın bəzəyinə çevrilir. Amma bu məsələdən ictimaiyyət yalnız Əmirhan ilə Berkaya birbaşa cəza verildikdən sonra xəbər tutdu.

Hər iki futbolçu ümumi bir bəyanat yayıb. Onlar bu olayın karyeralarına ciddi kölgə saldığını və günahsız olduqlarını sübuta yetirməyə çalışacaqlarını qeyd ediblər. Zatən bu cür vəziyyətdə olan idmançıların 99 faizi günahsız olduğunu iddia edir. Həm Əmirhan, həm də Berkay 2003 təvəllüddü. Onların hər ikisi 2021-də ''Beşiktaş''la ilk peşəkar müqaviləni imzalayaraq əsas komandaya dəvət olunmuşdu.

Maraqlıdı ki, Berkay 2021-də Çempionlar Liqasında ''Ayaks''la qarşılaşmada debüt matçına çıxmışdı. O matçda meydanda olduğu 17 dəqiqə onun ilk mövsümdə şans qazandığı yeganə oyun oldu. 2022/23-də bir neçə oyunda forma geysə də, onun ''Beşiktaş''ın səviyyəsinə uyğun gəlmədiyi dərhal hiss olundu. Ötən mövsümün ilk dövrəsini icarə əsasında ''Şerif''də keçirən yarımmüdafiəçi bu ilin yayında İstanbul nəhəngindən ayrılaraq ''Fatih Karagümrük''ə yollandı. Əmirhan Delibaşın da karyerası bənzər şəkildə irəliləyib. Fərq ondadı ki, ''Ayaks''la matçda o, iştirak ərizəsində olsa da, meydana çıxmadı və ötən mövsümün ilk dövrəsini icarə əsasında ''Şerif''də yox, ''Göztəpə''də keçirdi. O da Berkay kimi bu yay ''Qartal''dan birdəfəlik ayrılaraq 1-ci liqa təmsilçisi ''Fatih Karagümrük''ə yollandı.

Görünür, klub rəsmiləri bu qalmaqallı məsələdən hələ avqustda xəbər tutubmuşlar. Çünki həm Berkay, həm də Əmirhan ''Karagümrük''də ilk və son oyununu avqustda keçirib. O vaxtdan bu yana onların adları heç iştirak ərizəsinə də düşməyib. Hər iki futbolçu eyni fərdi məşqçi ilə məşq edirdi. İkisi də iddia edir ki, dopinq onların qanına fərdi məşqçinin vurduğu iynə ilə keçib. Guya onlar həmin iynədə qadağan olunmuş maddə olduqlarını bilmirdilər. Hər iki futbolçu həmin fərdi məşqçidən maddi və mənəvi ziyanın ödənilməsini tələb edərək məhkəməyə müraciət ediblər.

ƏLİ