“Qəbələ” ilə daha iki oyunumuz olacaq” - “Karvan” çempionluq arzusunu “dəfn etməyib”
Mövsümə uğurlu başlayan, daha doğrusu, ilk 6 turda qələbə qazanan “Karvan” son üç matçda ancaq xal itirib. Yevlax təmsilçisi “Cəbrayıl”la (1:2) “Qəbələ”yə uduzubsa (0:1), “Zaqatala” (2:2) ilə heç-heçə edib.
Təbii ki, sonuncu uğursuzluğu aparıcı futbolçulardan Müşfiq və Bəhruz Teymurovların cəzalı olmasıyla əlaqələndirə bilərik. Bəs “sülh”ü başqa səbəblərlə əlaqələndirmək mümkündümü?
Bu suallarla “Karvan”ın baş məşqçisi Kənan Kərimova müraciət etdik. Onun “Football-plus.az”a dedikləri:
“Bəli, Bəhruzla Müşfiqin cəzalı olması komandanın ümumi performansına mənfi təsir etdi. Bilindiyi kimi, Bəhruz bombardirimiz, Müşfiq kapitanımızdı. Belə vacib oyunçuların meydanda olmaması bizim üçün ağır itkidi. Onların yerini doldurmaq asan iş deyil. Qış fasiləsinə qədər maksimum xal toplamağa çalışacağıq. Qalan üç oyunun hamısında qələbə qazanmaq istəyirik. Transfer dönəmində isə yeni futbolçularla güclənəcəyik. Bilirik ki, cəzalılar meydana qayıdandan sonra formasını bərpa etmək üçün zaman lazım olacaq. Vaxt itirməməliyik”.
Kənan bəy “Zaqatala”ya qarşı keçirilən 9-cu tur matçının 90+4-cü dəqiqəsində qapılarına təyin edilən və qələbənin əldən çıxmasına səbəb olan penalti haqda bunları dedi:
“Düzü, qərardan narazı deyiləm. Amma penalti verilməyə də bilərdi”.
Mütəxəssis klub rəhbərliyi tərəfindən qarşısına qoyulan məqsədi də açıqladı:
“Hədəfimiz mövsümü ilk “üçlük”də bitirməkdi. Qarşımıza konkret çempion olmaq tələbi qoyulmayıb. Lakin şansımız varsa, bunu bacarmaq istəyirik. Əlimizdən gələni etməyə hazırıq. Çempionat uzundu. Qarşıda xeyli tur var. “Qəbələ” ilə daha iki oyunumuz olacaq. Xal itirməməliyik ki, mübarizədən qopmayaq”.
Qeyd edək ki, “Karvan” bu gün evdə “Mingəçevir”i qəbul edəcək. Bu oyun saat 14.00-da başlayacaq.
KƏNAN BAHADIR
Digər xəbərlər
