Region Liqası: 55 komanda qeydiyyatdan keçib!
AFFA Region Liqasının 2024/25 mövsümünə hələ də start verilməyib. Xəbər verdiyimiz kimi, turnirə qatılmaq arzusunda olanlar üçün son müraciət tarixi kimi oktyabrın 1-i göstərilmişdi.
Deyilənə görə, Region Liqası COP 29-dan sonra başlayacaq. Görəsən, püşkatma mərasimi nə zaman keçiriləcək? Bu sualı AFFA-nın Mətbuat və İctimaiyyətlə Əlaqələr departamentinin rəhbəri Elnur Məmmədliyə ünvanladıq:
“Region Liqasında iştirak üçün 55 komanda qeydiyyatdan keçib. Yarışın start vaxtının müəyyənləşməsi COP 29 ilə bağlı deyil. Gözlənilir ki, Region Liqasında yeni mövsümə dekabrın ortalarında start verilsin”.
Müqayisə üçün xatırladaq ki, Region Liqasının ötən mövsümündə 40 komanda iştirak edib, yəni say baxımından ciddi artım var.
ƏSƏD SEYİDOV
