“Əlbəttə, Estoniya ilə oyunda hamımız qələbə gözləyirdik. Düzdü, əsas nəticədi. Bu dəqiqə yaxşı oyuna baxmırlar. Təbii ki, bizə də həmin qarşılaşmada nəticə lazım idi. İmkanlar olsa da, onlardan yararlana bilmədik. Düzdü, komandamız, demək olar, bütün oyunu rəqib qapısı qarşısında keçirdi. Bir neçə dəfə imkanlar da yaratdıq. Buna baxmayaraq, qol vurulmadı. Bu, bilavasitə yaxşı oyunun yox, nəticənin yadda qalmasının bariz sübutudu. Təbii, heç-heçə etmək yaxşı hal deyil. Estoniya ilə oyunda bizə 3 xal lazım idi. Təəssüf ki, 1 xalla kifayətlənməli olduq. O ki qaldı İsveçlə oyuna, heç-heçə də bizə kömək etmir. D liqasına düşməmək üçün bizə mütləq və mütləq qələbə lazımdı. Bu axşam bizə çətin olacaq. İsveç yığması Bakıdakı oyunda da qələbə qazandı. Düzdü, həmin oyunun 44-cü dəqiqəsində Ramil Şeydayev penaltini qola çevirsəydi, bəlkə də nəticə başqa cür ola bilərdi. Amma bu futboldu. İmkanlardan istifadə edə bilmədinsə, rəqib də boşluqlardan yararlanıb qələbə qazanır. İsveçlə oyun çox çətin olacaq. Hazırda qrupun lideridilər. İsveçlilərin bizə yuxarıdan aşağı baxacağına inanmıram. Bilirlər ki, ötən il Bakıda onlara 3:0 hesabıyla qalıb gəlmişdik. Ona görə bu oyuna da çox ciddi çıxacaqlar. Əlbəttə, komandamız bunu nəzərə alacaq. Ümid edək ki, bərabərə qalarıq. Mənə elə gəlir ki, bu, yaxşı nəticə olar. D liqasında o cür komandalarla oynamaq məcburiyyətindəyik. İstərdik ki, yaxşı ölkələrin milliləri ilə görüşək. Güclü komandalara qarşı çıxış edəndə istər-istəməz futbolçularda da artım olur. Amma o demək deyil ki, D liqasındakı komandalar futbol oynaya bilmir, zəifdilər. Bu dəqiqə bütün ölkələr müdafiə olunmağı da, hücum etməyi də bacarırlar. Yəni D liqasında oynayan komandalar da güclüdü. Deyim ki, aşağı liqaya düşən kimi bütün klubları məğlub edəcəyik, onu da gözləmək lazım deyil. Düşünürəm ki, orda da bütün oyunlar çətin olacaq. Təəssüf ki, D liqasına düşürük. Heç birimiz düşünməz, istəməzdik. Bütün ölkələrdə də inkişaf gedir. İnanaq ki, gələn ildən strategiyamız dəyişəcək. Səhv etmirəmsə, o gün dedilər ki, dekabrdan sonra, yanvar ayından artıq nə istəyiriksə, onu yerinə yetirəcəklər. Gözləyək, görək gələn ildən necə olur. Milli komandamıza uğurlar arzulayıram. İnanaq ki, yığmamız, heç olmasa, İsveçlə oyunda yaxşı nəticə əldə edəcək”.