“Fənərbaxça”nın baş məşqçisi Joze Mourinyo hər hərəkəti və açıqlaması ilə gündəm olmaqda davam edir.

Portuqaliyalı mütəxəssis bir müddət öncə İngiltərənin “Skay Sports” kanalına açıqlamalar verərkən “premyer-liqa Avropada ən güclü çempionatdı, amma elitada qalmaq uğrunda oynayan kluba görə heç vaxt premyer-liqaya qayıtmaram” sözlərini işlətmişdi. Mourinyonun bu sözlərinin əsl səbəbi bəlli olub. Sən demə, 61 yaşlı çalışdırıcı iki həftə öncə “Everton”dan təklif alıbmış. Özü də astronomik təklif! Türkiyə mətbuatının iddiasına görə, “Everton”un sahibi, iranəsilli britaniyalı iş adamı Fərhad Moşiri Mourinyoya Türkiyədə qazandığından daha çox pul təklif edibmiş.

Maraq üçün Mourinyonun “Fənər”də illik qazancının 10,5 milyon avro olduğunu bildirək. Ancaq “Everton” son illərdə olduğu kimi, bu mövsüm də iddialı deyil və yalnız premyer-liqada yerini qorumaq üçün oynayır. Mourinyo da həmin açıqlamanı məhz buna görə veribmiş. Bundan başqa, Mourinyo elə həmin kanala açıqlamasında “Fənərbaxça”dan heç bir halda ayrılmayacağını və nəinki bu mövsümün sonuna qədər, hətta gələn mövsüm də komandanın başında yer alacağını bildirib.

Bu arada Mourinyo srağagün kuryoz olayla qarşılaşıb, üstəlik bunu öz “instaqram” səhifəsində də paylaşıb. Belə ki, o, məşqdə qısa məsafədəki ikitərəfli oyun zamanı İsmayıl Yüksəklə toqquşaraq yerə yıxılıb. Ayağından xəsarət alan məşqçi köməkçilərinin yardımı ilə meydanın kənarına gəlib. Bundan başqa, onun bazanı tərk edərkən axsaması da diqqəti çəkib. Mourinyo həmin epizodun videosunu öz səhifəsində paylaşaraq bunları yazıb:

Mourinyonun başına gələn bu hadisə təkcə futbolsevərlərin yox, sabiq oyunçularının da marağına səbəb olub. Con Terri şərh bölməsinə gülüş işarələri qoyubsa, Nemanya Matiç gülüş işarələri ilə yanaşı, “buna layiqsən” sözünü də yazıb. “Fənər” fanatları isə İsmayıl Yüksəkin gələcəyindən narahatdı. Onlar son vaxtlar onsuz da az oynayan bu futbolçunun Mourinyonu zədələyəndən sonra daha da gözdən düşəcəyini iddia ediblər.