Samir Abasovdan sonra “Sumqayıt”ın “sükanı arxasına” keçən Vaqif Cavadov ilk qələbəsini “Səbail” üzərində qazandı.

“Sumqayıt”ın kapitanı Vüqar Mustafayev oyundan sonra “Football-plus.az”a danışdı.

- “Səbail”lə oyunda qazandığınız 3 xalı necə şərh edərdin?
- Əvvəla qələbə münasibətilə komandamızı da, azarkeşlərimiz təbrik edirəm. "Səbail"lə xalımız eyni idi. Bu oyunun məsuliyyətini hamımız dərk etdik. İstəyirdik ki, qələbə qazanaq. Olduğumuz pillədən yuxarı yerlərə irəliləmək fikrindəyik. Şükür ki, qələbə qazandıq. Məğlub da ola, heç-heçə ilə də qurtara bilərdik. Rəqib üçün də vacib oyun idi.

- 7 tur sonra qələbə qazandız. Vaqif Cavadovun gəlişiylə komandada nə dəyişdi?
- Vaqif müəllim bizə yaxındı. Bir çoxumuz Vaqif Cavadovla birgə top qovmuşuq, bəzilərimiz bir-birimizə qarşı oynamışıq. Ona görə yerli futbolçuların Vaqif müəllimə münasibəti daha yaxşıdı. Biz də istəyirik ki, həm Vaqif müəllim, həm də özümüz üçün qələbə qazanaq. Ümid edirəm ki, onun da baş məşqçi karyerasında yaxşı addım olar.

- Samir Abasov da emosional idi, amma Vaqif Cavadov daha emosional görünür. Əsas komandada ilk təcrübəsini nəzərə alsaq, sizə istəklərini tam çatdıra bilirmi?
- Biz başa düşürük ki, o bizdən nəyi, necə oynamaq lazım olduğunu istəyir. Çalışırıq onun istədiklərini meydanda həyata keçirək. Amma hələ ikinci oyunudu. Ola bilər ki, istəklərinin çoxunu yerinə yetirə bilmirik.

- Samir Abasovun gedişi bir kapitan kimi səni nə dərəcədə məyus etdi?
- Artıq iki ilə yaxın idi Samir müəllimlə işləyirdik. Bilirdik ki, o bizdən nə istəyir. Gedişi gözlənilməz oldu. Ona da uğurlar arzulayırıq. Samir müəllimlə son iki turda "Neftçi" və "Qarabağ"a qarşı yaxşı oynadıq. Hiss edirdik ki, daha yaxşı təsir bağışlayırıq. Samir müəllim getdi, sadəcə, uğurlar arzulayıram. Onun üçün də, bizim üçün də xeyirlisi olsun.

- Vaxtilə "Qarabağ"da forma geymisən. Avropa Liqasındakı oyunlarını izləyirsənmi? "Ayaks"la qarşılaşma barədə fikirlərin?
- Açığı, bu oyunda "Qarabağ"a ümidlərimiz böyük idi. Gözləyirdik ki, xal qazanaq. "Qırmızı" alana qədər "Qarabağ" çox yaxşı təsir bağışladı. “Qırmızı” olmasaydı, "Qarabağ" udacaqdı. Mən də, oyuna baxdığımız digər komanda yoldaşlarımız da belə fikirdəydi. İnanıram ki, növbəti mərhələ çıxa biləcəklər. Hələ qarşıda 5 oyun var.

RÖYANƏ OĞUZ