“Turan Tovuz” tarixi rekordunu növbəti dəfə təkrarlayıb.

"Football-plus.az" xəbər verir ki, Tovuz təmsilçisi bunu ölkə kubokunun 2-ci təsnifat mərhələsinin “Hypers Quba” ilə matçında (7:2) reallaşdırıb. “Turan Tovuz” 4-cü dəfə bir oyunda 7 qol vurub. Tovuz təmsilçisi 2016/17 mövsümündə 1-ci divizionda (indiki 1-ci Liqa) oynadığı vaxt üç fərqli qarşılaşmada belə məhsuldar olub. “Energetik” komandasını 7:0 və 7:1, “Bakılı”nı 7:0 hesabı ilə məğlub edən tovuzlular həmin rekordu yenidən təkrarlayıb.

Amma 7:2 hesablı qələbə klub tarixinə kubokdakı rekordlarla düşüb. “Turan Tovuz” bu turnirdə ən böyük qələbəsini qazanıb, ən yüksək məhsuldarlığını göstərib və ən qollu matçını keçirib. Bunadək hər üç rekord ötən mövsümün “Göygöl”lə matçına məxsus idi. Həmin vaxt tovuzlular 5:1 hesablı qələbəyə seviniblər.