Vüqar Nadirov “Şahdağ Qusar”ın gücünü etiraf etdi
İkinci liqanın 8-ci turu şimal derbisiylə əlamətdar oldu. 2 min azarkeşin izlədiyi oyunda “Hypers Quba” “Şahdağ Qusar”a uduzdu.
Vüqar Nadirovun çalışdırdığı komanda cari mövsümdəki 2-ci məğlubiyyətini aldı. Dünən Vüqar bəylə əlaqə saxlayıb, oyunla bağlı təəssüratını öyrəndik:
“Əvvəlcə rəqibi təbrik edirəm. Əsl derbiyə layiq oyun izlədik. Oyuna yaxşı başlamadıq, ilk hissədə səhvlərimiz oldu. Vacib oyunçularımızdan Qeyrət Əliyevi məcburiyyətdən əvəzlədik. Bu dəyişiklik də istər-istəməz təsir göstərdi. Rəqibin qələbəsinə kölgə salmaq istəmirəm, amma nəzərə alaq ki, üç futbolçumuz zədəli idi. “Şahdağ Qusar”ın heyətində olduqca təcrübəli futbolçular yer alıb, meydanda öz işlərin rahatlıqla görürlər. Biz də öz növbəmizdə heç bir rəqabətdən qaçmırıq, sona qədər mübarizə aparacağıq”.
Nadirovdan hazırda qərarlaşdıqları 3-cü yerin komandasını qane edib-etmədiyini də soruşduq:
“Hypers Quba” yeni qurulmuş komandadı. Belə oyunlar təcrübədi. Oyundan sonra paltardəyişmə otağında da futbolçularımı mübariz oyuna görə təbrik etdim. “Turan Tovuz”la kubok oynuna hazırlaşırıq. İndidən hansısa yer haqda danışmağımız düzgün olmaz. Qarşıda oyunlarımız çoxdu. Marafon uzundu. Mənə elə gəlir ki, ikinci dövrə daha çətin olacaq”.
RÖYANƏ OĞUZ
Digər xəbərlər
