“Turan Tovuz” - “Kəpəz” oyununu izləyənlər arasında AFFA-nın icraçı vitse-prezidenti Sərxan Hacıyev də var idi. O, oyundan sonra jurnalistlərin suallarını cavabladı.

- Bu gün qadınlardan ibarət millimizin tarixi oyunu var idi. Maraqlıdı ki, siz niyə məhz orda yox, burdasız?
- Portuqaliya miliisi güclü idi. Növbəti oyunlarda yığmamızdan qələbə gözləyirik. Millimizin müsbət dinamika sərgiləməsi hər birimizi sevindirir. Bizim bu səfərimiz bir neçə məqamdan ibarətdi. Kişilərdən ibarət yığma Qəbələ şəhər stadionunda oyunu keçirəcək. Orda müəyyən təmir-tikinti işləri aparılır, UEFA-nın birbaşa tələbidi. Bizim və qonaq komanda üçün müəyyən tədbirlər görülüb. Görülən tədbirlərlə yerində tanış olmaq vacib idi. Həmçinin qərb derbisi var idi. Millimizin baş məşqçisi də bu oyuna gəlmək istəyirdi. Bu gün də Fernando Santuşla birlikdə Gəncədə inşa olunan bazayla tanış olacağıq. Ola bilər ki, yığma səviyyəsində gələcəkdə orda təlim-məşq toplanışları olsun. Stadionda tikinti işləri davam edir.

- Yığmanın İstanbulda oynaması variantı da var idi. Biz istəmədik, yoxsa UEFA qarşı çıxdı?
- Bir neçə ehtimal var idi. Lakin əsas variant Qəbələ idi. Qonaq komandanın da razılığına ehtiyac var idi. UEFA-nın qərarları ilə tanış olduqdan sonra birinci varinatın üstündə qaldıq.

- Estoniya əvvəlcə Qəbələdə oynamaq istəmirdi. Onları razı salmaq çətin olmadı?
- Xeyr. Estoniya millisini maraqlandıran məqamlar var idi. Danışıqlar da uzun proses olmadı.

- Son vaxtlar 2-ci liqada maliyyə məsələsi çox qabarıb. Onlara hansısa dəstək olacaqmı? Büdcə artımı müzakirəyə çıxarılacaqmı?
- Bu məsələ bizi də narahat edir. Belə halları görmək bizə də xoş deyil. Lakin AFFA tərəfindən ayrılan məbləğlə yanaşı, klublar da müəyyən iş görməlidi.

- Yeni AFFA rəhbərliyi sponsor tapılması və ya iş adamlarının futbola cəlb olunması yolunda hansı addımları atmaq istəyir?
- FİF AFFA tərəfindən yaradılıb. Futbolun İnkişaf Fondu müəyyən vaxtlar “Turan Tovuz”a kömək göstərib. Çalışırıq ki, FİF ilə birlikdə müəyyən işlər aparaq.

- “Lerik” Lənkəranda, stadion tapmayan komandalar Şamaxı Olimpiya Kompleksində oyunlar keçirir. Hər klub nə vaxt təmsil etdiyi rayonda oynayacaq?
- Hazırda bu məsələ ilə bağlı konkret qərar yoxdu. Müzakirələr aparılır. Elitadan başlayaraq, aşağı liqalara doğru stadionu olmayan komandalar buraxılmayacaq. Hər komanda öz regionunu təmsil etməlidi.

- 2-ci liqa klublarına ödəmələrdə gecikmə var…
- Çalışırıq ki, gecikmə olmasın. Sənədləşdirmə məsələlərində gecikmə olur. Əlimizdən gələni edirik ki, gecikmə olmasın.

- Mediada yayılan məlumatlara görə, AFFA ayrılan büdcədən əlavə “Kəpəz”ə 500 min manat yardım edib. Həqiqətən belə proses baş veribmi?
- Rəsmi şəkildə deyə bilərəm ki, yayılan xəbərlər həqiqəti əks etdirmir. Bir komandaya belə etsək, başqalarına münasibətdə haqsızlıq etmiş olarıq.

ƏSƏD SEYİDOV