Ölkəmizin futzal yığmasının qapıçısı Rövşən Hüseynliyə məşqçiliyə başlayıb.

Bu yay Qazaxıstan “Astana”sına keçən futzalçı artıq oynamaqla yanaşı, komandanın qapıçılarını da hazırlaşdıracaq.

- Qapıçıları çalışdırmaqla bağlı təklif alanda çox fikirləşdin?
- İlk danışığımız oyunçu-qapıçı kimi olmuşdu. Bu yöndə razılaşıb, klubla müqavilə bağlamışam. İş elə gətirdi ki, məşqçi kimi də davam etməli oldum.

- Bilirik ki, iyunun sonunda “Atırau”dan “Astana”ya keçdin. Belə çıxır ki, yeni klubunda etimadı doğrultmusan.
- Bəli, bir neçə ay öncə "Astana" ilə birillik müqavilə bağladım. Sadəcə, öz üzərində daha çox işləmək, məşq etmək önəmlidi. Daim irəli baxmaq lazımdı.

- Özünü qapıçılar üzrə məşqşi olmağa tam hazır hiss edirsənmi?
- Qapıçı məşqçisi olmaq mənə yad deyil. Birvaxtlar "Araz-Naxçıvan"da, hətta milli komandada bu təcrübəyə yiyələnmişəm. Mənim üçün bu sahədə ən böyük təcrübə minifutbol çempionatında çıxış edən “Birbaşa” olub. Uzun müddət bu klubda çalışmışam. Sizin vasitənizlə “Birbaşa” rəhbərliyinə - İlkin bəy və Kamil bəyə mənə bu şansı yaratdıqları üçün təşəkkür edirəm.

- Təyinat alarkən rəhbərlik qarşında hansısa şərt qoydu?
- Qarşıma heç bir şərt qoyulmayıb, sadəcə, komandanın qapıçıları formada olmalıdı - əsas budu. Bildiyiniz kimi, "Astana"nın rəhbəri azərbaycanlıdı. Fürsət düşmüşkən, Fərid bəyə mənə etimad göstərdiyinə üçün təşəkkürümü bildirirəm.

- Azərbaycan yığmasında sənə bu vəzifə təklif edilsə, razılıq verərsinmi?
- Bəli, əlimdən gələn qədər ən yaxşı formada Azərbaycan millisinə xidmət etmək borcumdu. Məşqçiliklə bağlı indidən düşünmək çox tezdi. Hələ karyeramı bitirmək, məşqçiliyə başlamaq barədə düşünmək istəmirəm. Amma planımı soruşursusa, bəli, var. Gələcəkdə Azərbaycan yığmasında istər qapıçı məşqçisi, istərsə də baş məşqçi kimi özümü sınamaq istəyərəm. Bunun üçün də təhsil almalı, təcrübə keçməli, hərtərəfli hazır olmalıyam.

- Azərbaycan Futzal Federasiyası ilə bu variantın mümkünlüyünü müzakirə edibsənmi?
- Xeyr, heç bir müzakirəsiz olmayıb. Çünki bununla bağlı danışmaq çox tezdi. Hələ ki karyeramı bitirmək barədə düşünmürəm. Hələ futzalçı kimi davam edirəm. İstər klubum, istərsə də milli üçün ən yaxşısını futzalçı Rövşən Hüseynli kimi etməyə çalışıram.

RÖYANƏ OĞUZ