MHL-də mübarizə tədricən qızışır. “Toronto”nu evdə məğlub edən “Monreal” rəqibin ən azı bir qol vurduğu oyunlar seriyasını 227-də dayandırdı. 2021-ci il noyabrın 21-də start götürən seriya MHL-də uzunluğuna görə səkkizincidi. Bu göstəricidə lider “Kalqari”di – 264 oyun (1981-ci ilin noyabrında başlayıb, 1985-ci il yanvarın 9-da bitib).

Stenli Kubokunu da nəzərə alsaq, “Toronto”nun seriyası 252 oyuna çatıb ki, bu da MHL tarixində 3-cü göstəricidi.

Müntəzəm çempionatda son 4 gündə keçirilən oyunlarla bağlı başqa maraqlı məqamlar da var. “Reyncers”in səfərdə “Pittsburq”u 6:0 hesabıyla darmadağın etdiyi oyunda qonaqların qapıçısı İqor Şesterkin 29 zərbənin qarşısını aldı. Nyu-York klubu son 67 ildə ilk dəfə mövsümün startında “quru” oyun keçirdi. Sonuncu dəfə belə nəticə 1956-cı il oktyabrın 12-də qeydə alınıb, həmin gün “Çikaqo” ilə oyunda “Reyncers”in qapısını Hamp Uorsli qoruyub.

“Kolorado”nun çexiyalı qapıçısı İvan İvan MHL tarixinə adı və soyadı tam üst-üstə düşən ilk oyunçu kimi düşdü. 22 yaşlı hokkeyçi “Evelanş”ın heyətində “Veqas”la oyunda debüt etdi. Buz üzərində 9 dəqiqə 44 saniyə olan forvard məhsuldar hərəkətlə yadda qalmadı.

“Kolorado”nun digər hücumçusu Natan Makkinnon isə elə həmin oyunda MHL-də 900 xal həddini aşdı. Forvard komandasının “Veqas”a 4:8 hesabıyla uduzduğu oyunda iki məhsuldar ötürmə verdi. Kanadalı MHL-də keçirdiyi 792 oyunda 901 (335+566) xal toplayıb. Fəaliyyətdə olan oyunçular arasında 900 xal həddinə daha tez çatanlar bunlardı: Konnor Makdevid (602 oyun), Sidni Krosbi (677), Yevgeni Malkin (762), Aleksandr Oveçkin (764).
Dünən keçirilən “Detroyt” – “Pittsburq” oyunu Yevgeni Malkin üçün əlamətdar oldu. “Pinqvinlər”in 6:3 hesablı qələbəsinə iki məhsuldar ötürmə ilə töhfə verən rusiyalı hücumçu MHL tarixinə düşdü. Belə ki, o, dünyanın aparıcı hokkey liqasında 800 məhsuldar ötürmə verən ilk rusiyalıdı. 38 yaşlı Malkin bu həddə çatan 34-cü hokkeyçidi. Fəaliyyətdə olan oyunçulardan yalnız Sidni Krosbi (1006) və Patrik Keyn (813) onu qabaqlayır.

MHL-dən gələn daha bir maraqlı xəbər isə pul-para ilə bağlıdı. “Forbes”in yaydığı məlumata görə, “Vaşinqton”un kapitanı Aleksandr Oveçkin daha MHL-in ən yüksək ödənişli oyunçusu deyil. 2024 reytinqinə inansaq, Şimali Amerika liqasında 2023/24 mövsümünün ən dəyərli oyunçusu Oston Mettyus (Toronto) ildə 21,7 milyon dollar qazanır. Qazanca görə ikinci pillədə “Kolorado”nun forvardı Natan Makkinnon (19,5 milyon dollar) qərarlaşıb. Ən çox qazanan hokkeyçilərin “3-lüy”ünü Oveçkin və “Edmonton”un forvardı Konnor Makdevid qapayır – hər biri 16 milyon dollar qazanır.

İlk “10-luq”da həmçinin Elias Pettersson (“Vankuver”, 14,8 milyon), David Pastrnyak (“Boston”, 14,5 milyon), Vilyam Nülander (“Toronto”, 13,8 milyon), Ceyk Hentsel (“Tampa-Bey”, 13,5 milyon), Rasmus Dalin (“Baffalo”, 13,1 milyon) və Set Cons (“Çikaqo”, 12,8 milyon) qərarlaşıb.

2023-cü ilin reytinqində isə Oveçkin Makkinnonla birgə MHL-in ən yüksək ödənişli oyunçusu idi. Onların hər birinin qazancı 17,5 milyon dollar təşkil edirdi.

8 oktyabr
Sietl Sent-Luis 2:3 (0:0, 2:3, 0:0)

9 oktyabr
Florida Boston 6:4 (4:1, 1:1, 1:2)
Yuta Çikaqo 5:2 (2:0, 1:1, 2:1)

10 oktyabr
Monreal Toronto 1:0 (1:0, 0:0, 0:0)
Pittsburq Reyncers 0:6 (0:3, 0:1, 0:2)
Edmonton Vinnipeq 0:6 (0:2, 0:3, 0:1)
Vankuver Kalqari 5:6 ОТ (4:1, 0:1, 1:3, 0:1)
Veqas – Kolorado 8:4 (3:1, 2:2, 3:1)

11 oktyabr
Boston – Monreal 6:4 (3:2, 2:0, 1:2)
Baffalo – Los-Anceles 1:3 (0:0, 1:0, 0:3)
Detroyt – Pittsburq 3:6 (1:1, 1:3, 1:2)
Nyu-Cersi – Toronto 2:4 (1:3, 1:1, 0:0)
Ottava – Florida 3:1 (2:0, 0:1, 1:0)
Aylenders – Yuta 4:5 ОТ (1:1, 0:1, 3:2, 0:1)
Minnesota – Kolambus 3:2 (1:0, 1:1, 1:1)
Neşvill – Dallas 3:4 (0:0, 1:4, 2:0)
San-Xose – Sent-Luis 4:5 OT (2:1, 2:0, 0:3, 0:1)