“Autsayderə uduzmağımız normaldı. Çünki biz 10 nəfərlə oynadıq, "Səbail" 12 nəfərlə. Sual yarana bilər ki, necə yəni 12 nəfərlə? Sağ olsun Əliyar Ağayev, "Səbail"in orta xəttində çox yaxşı oynadı. İbrahim Konateyə "qırmızı" verdi. Bilinmir heç o vərəqəni nəyə görə verdi, necə verdi. Axı bu qədər camaat izləyir, millət sənə baxır. Yəni neçə özünə sığışdıra bilərsən?! Birbaşa şəxsi qərəzdi.

Bunu həmişə demişəm ki, Əliyar Ağayevi şəxsən tanımasam da, işini bəyənmirəm. FİFA dərəcəli referidi, gedib "Real"ın, "Barselona"nın oyununu idarə edə bilər. Amma fakt göz qabağındadı. Bu gün reallığı danışmalıyıq. Həqiqətən çempionat oyunlarına gedib baxmaq istəmirəm. Çünki hər dəfə bir şey görürük. Artıq insan futboldan soyuyur. Hakimlikdə köklü dəyişikliklər olmalıdı. Necə ki oyunçular vərəqə alır, hakimlər üçün də müəyyən cəza nəzərdə tutulmalıdı. Belə olmalı deyil. Həqiqi mənada dərəbəylikdi.

Hansısa türkü və ya ingilisi başa gətirib otuzdurmaqla nəsə dəyişmir. "Şamaxı"nın da uduzmasında Əliyar Ağayevin əməyi böyükdü. Bilmirəm nə deyim, hisslərimi necə ifadə edim. Mənim üçün fərqi yoxdu, bölgə futbolunun inkişafından yanayam. Paytaxtda olan "Neftçi"ni çıxmaqla heç biri mənə maraqlı deyil. Çox təəssüf ki, autsayderə uduzduq. Komandanın uduzması normaldı, udarıq da, məğlub da olarıq. Məğlubedilməz komanda yoxdu. Amma qəsdi-qərəzlik, komandanı bu şəkildə uduzdurmaq lazım deyildi”.