Bir neçə gün əvvəl Edinson Kavaninin Avropanı tərk etdiyini xəbər vermişdik. O, artıq Argentinadadı.

"Football-plus.az"ın məlumatına görə, uruqvaylı futbolçu bugünlərdə “Valensiya” ilə müqaviləsini qarşılıqlı razılıq əsasında ləğv etmişdi.

36 yaşlı forvardın karyerasını Argentinada davam etdirəcəyi böyük ölçüdə məlum idi. O, artıq “Boka Xuniors”la müqavilə bağlayıb. Avropa karyerası ərzində İtaliyanın “Palermo” və “Napoli”, Fransanın PSJ və İngiltərənin “Mançester Yunayted” klublarında çıxış edən Kavaninin Buenos Ayres klubunun oyunçusu kimi təqdimatı olub. Forvard “La Bombonera” stadionunda azarkeşlər qarşısına çıxıb.
Qeyd edək ki, Edinson ötən mövsüm “Valensiya”nın heyətində 28 matçda meydana çıxıb, 7 qol vurub və 2 məhsuldar ötürmə verib. Onun “Danubio”nun yetirməsi olduğunu, 2007-ci ildə Avropaya üz tutmazdan əvvəl iki il bu komandada oynadığını, 2008-ci ildən dəvət aldğı Uruqvay millisində 136 oyunda 58 qol vurduğunu da xatırladaq.