Sabah (Bakı) - Araz-Naxçıvan 1:1 (1:1)
55. Nicat Mehbalıyev - 5,5
10. Namik Ələskərov - 5,0
(11. Kahim Parris, 64) - 5,5
4. Elvin Camalov (k) - 5,0
(6. Abdulax Xaybulaev, 74) - 5,0
2. Amin Seydiyev - 5,0
7. Boyan Letiç - 5,0
(17. Tellur Mütəllimov, 64) - 5,0
20. Coy-Lens Mikels - 5,5
18. Pavol Şafranko - 6,0
(88. Xəyal Əliyev, 89) - qiymətsiz
40. İqor Noqeyra - 5,5
70. Cesse Sekidika - 5,5
3. Con İrasabal - 5,5
13. İvan Lepinitsa - 5,5
Ehtiyat oyunçular
1. Yusif İmanov
94. Rəvan Mirzəmmədov
9. Anatoli Nuriyev
5. Rəhman Daşdəmirov
77. Şakir Seyidov
22. Abdulla Rzayev
99. Neqoş Kupusoviç
Baş məşqçi: Krunoslav Renduliç
Komandanın ən yaxşısı: Pavol Şafranko

12. Kristian Avram - 5,5
34. Urfan Abbasov - 5,5
(2. Slavik Alxasov, 87) - qiymətsiz
3. Bəxtiyar Həsənalızadə - 6,0
6. Vadim Abdullayev (k) - 5,5
26. Ömər Buludov - 5,5
29. Vanderson Melo - 5,0
23. Nuno Rodriges - 5,5
14. Miço Kuzmanoviç - 5,5
4. İqor Ribeyro - 5,5
97. Felipe Santos - 6,5
(17. İssuf Paro, 90+4) - qiymətsiz
10. Bernardo Dias - 5,5
(7. Ülvi İsgəndərov, 83) - qiymətsiz
Ehtiyat oyunçular
94. Tərlan Əhmədli
1. Vüsal Şabanov
22. Elçin Mustafayev
20. Turan Vəlizadə
88. Tuqay Əlizadə
11. Bayraməli Qurbanov
24. Mustafa Əhmədzadə
71. Sənan Ağalarov
16. Ramon Maçado
Baş məşqçi: Elmar Baxşıyev
Komandanın ən yaxşısı: Felipe Santos

Qollar: P Şafranko, 5 (1:0). F.Santos, 8 (1:1, B.Həsənalızadə).
Vərəqələr: B.Letiç, 16 (qeyri-idman hərəkəti). F.Santos, 76 (qeyri-idman hərəkəti) - sarı.
Hakimlər: CAVİD CƏLİLOV, Kamran Bayramov, Müslüm Əliyev, Rauf Allahverdiyev (hamısı Bakı).
VAR hakimi: Rauf Cabbarov (Bakı).
VAR hakiminin köməkçisi: Rəhman İmami (Bakı).
Hakim-inspektor: Rəhim Həsənov (Bakı).
AFFA nümayəndəsi: Zümrüd Ağayeva (Bakı).
5 oktyabr. Bakı. "Bank Respublika Arena". 600 tamaşaçı (8700 yerlik).
Birinci hissəyə 2, ikinci hissəyə 4 dəqiqə əlavə olunub.
Oyunun qiyməti: 5,5.

9-cu tura start verilməzdən əvvəl hansı matçda daha əzmkar mübarizəyə şahid olacağımı təxmin etsəm, ağla məhz bu oyun gələrdi. Ona görə ki, "Araz-Naxçıvan" qələbə qazansa, yenidən azı birgünlüyə turnir cədvəlinin lideri olacaqdı. "Sabah"ın qələbəsi isə liderlər qrupunda möhkəmlənməsiylə nəticələnəcəkdi. Əlbəttə, əzmkarlıq həm də futbolçuların keyfiyyətindən, potensialından asılıdı. Cavabımı elə bu məqamla əsaslandıracaqdım. Axı həm Masazır, həm də Muxtar Respublika təmsilçisi heyətləri sayəsində təcrübəli və iddialı çıxışla yadda qalıb. Hər halda, 90 dəqiqənin 9 dəqiqə kimi keçəcəyini düşünmək olardı. Lakin hadisələrin axarı, xüsusilə, stadiona gələn azarkeşləri xeyli məyus etdi. Onlar demək olar ki, elə ilk 9 dəqiqədə əsl futbol izləyə bildi. Qolların vurulduğu və azsaylı təhlükəli epizodları saymasaq, bu, turun ən cansıxıcısı qarşılaşması idi. Baxmayaraq ki, debütdə yaşananlar qarşılıqlı hücumlarla zəngin baxımlı oyun vəd edirdi. Söhbət meydan sahiblərinin var gücüylə irəli atıldığı və qolla nəticələnən hücum cəhdindən, qonaqların dərhal özünü toparlayaraq imza atdığı "cavab atəşi"dən gedir.

"Bayquşlar" 5-ci dəqiqədə künc zərbəsi qazandı ki, topu oyuna Namik daxil etdi. "Çərçivə"ni əvvəl "kürə"ni cərimə meydançasının daxilində qarşılayan Lepinitsa nişan alsa da, Avram seyvlə yadda qaldı. Önünə düşən fürsəti dərhal dəyərləndirən Şafranko komandasını hesabda önə keçirdi. Amma "Sabah"ın qol sevinci uzun sürmədi. "Araz-Naxçıvan" qol sevincinin bihuş etdiyi rəqibin oyuna köklənməsinə imkan vermədən irəli atıldı. Bəxtiyarın uzaqdan ötürməsini qəbul edən Santos 8-ci dəqiqədə İrasabal, Noqeyra, Amin və Lepinitsanın təzyiqinə baxmayaraq, topu tora qovuşdurdu. Yəqin ki, bu məqamda günahın "bayquşlar"ın dillər əzbəri olan yarıtmaz müdafiə xəttində olduğunu təxmin etmək çətin deyil.
Ardından hadisələrin meydanın mərkəzində cərəyan etdiyini desək, yanılmarıq.

Komandalar sanki hücum etməkdən çəkindi, qısa ötürmələrlə rəqibini yormağa, bəlkə də hesabı qorumağa üstünlük verdi. Belədə yalnız ikinci yarı üçün ümidli olmaq mümkün idi. Lakin komandalar bu dəfə də dəst-xəttini pozmamağa çalışdı. Daha doğrusu, 46-cı dəqiqədə Mikels cərimə meydançası daxilində dəqiq ola bilmədi. O, Sekidikanın ötürdüyü topa zərbə endirsə də, "kürə" qapının üzərindən şütüdü. 50-ci dəqiqədə Ömər Kuzmanoviçin qol vurması üçün şərait yaratdı. Amma Miço Letiçlə təkbətək mübarizədən qalib ayrılmadığından fürsət əldən çıxdı. Bir qədər sonra Santos topu geri almaq məqsədilə Rodrigesə çatdırıb irəli atıldı. Burda Nuno "çərçivə"ni nişan almaq qərarına gəldi ki, Nicat zərbəni dəf etdi. 66-cı dəqiqədə Bəxtiyar kritik müdaxiləylə Sekidikanın qapını nişan almaq cəhdinə mane oldu. Ardından "Araz-Naxçıvan"ın təzyiqi artırdığı epizodlara şahidlik etdik. Belədə Nicat sıra ilə Diasın və başla bəxtini sınayan Rodrigesin zərbələrini zərərsizləşdirdi. 71-ci dəqiqədə isə Santosun sürətli ötürməsinə çata bilməyən Miço əla fürsəti boşa verdi.

Bir qədər sonra "Sabah"ın qolla nəticələnməyən hücumuna şahidlik etdik. Burda Sekidika Abdulaxın göndərdiyi topu uzaqdan tora qovuşdurmaq istəsə də, Avram yerində idi. Qolkiper 90+1-ci dəqiqədə Parrisin də fərqlənməsinə imkan vermədi. Beləcə Cəlilovun final fiti eşidildi. Nəticədə "Sabah" "avrokubok zonası"ndan uzaq düşdü. "Araz-Naxçıvan" isə istəyinə çatdı - liderlər qrupundan qopmadı!

Gözdən qaçmadı
* Matçdan əvvəl övladıyla birgə stadiona gələn tamaşaçıyla mühafizəçilər arasında anlaşmazlıq yarandı. Çünki əməkdaşlar onun oğluna aldığı çərəzlərin arenaya buraxılmasının qadağan edildiyini, həmin şeylərin idman qurğusunun daxilində satıldığını bildirdi. Tamaşaçı duruma etiraz etdikdən sonra stadionu tərk etdi.
* "Soldati di Sabah" əvvəldən sona qədər komandasını dəstəklədi.  "Araz-Naxçıvan"ın "Sektor 56" fanklubu isə tribunalarda yox idi.
* Matç ərzində Amin Seydiyevlə Felipe Santos arasında gərginlik yaşandı. Onlar bir-birinə kobud müdaxilələr etməklə acıq çıxmağa çalışırdı. Münaqişə Cavid Cəlilovun Santosa sarı vərəqə göstərməsindən sonra dayandı.

KƏNAN BAHADIR