“Əlbəttə, “Xankəndi”nin yaradılması ideyası birdən-birə ortaya çıxmayıb. Əvvəla qeyd edək ki, bu nöqtəyə gəlmək üçün Azərbaycan dövləti, Azərbaycan insanı 30 il nə qurbanlar verib, nə məhrumiyyətlər yaşayıb - hamımız fərqindəyik. Bilirsiz ki, fubol ölkəmizdə ən populyar idman növüdü, işğaldan azad olunan yaşayış məntəqələrinə böyük futbolun qayıdışı bölgə ilə bağlı dövlət siyasətinin də prioritetlərindəndi. Elə bunu əsas götürərək düşündük ki, “Xankəndi”ni təsis edib Azərbaycan futboluna qazandırmağın tam zamanıdı. Klub prezidenti Elnur Məcidov futbola yad adam deyil, onunla çoxdan tanışıq, münasibətlərimiz var. O, həmçinin məni böyük futboldan tanıyır, əlaqələrimə, təcrübəmə bələddi. Belə oldu ki, bir araya gəldik, xeyli müzakirələrimiz oldu, “Xankəndi”nin ortaya çıxması ideyası ilə bağlı fikirlərimiz üst-üstə düşdü, uzlaşdı. Nəticədə qərara aldıq ki, birlikdə bu klubu təsis edək, komandanı quraq və onu qaydalara uyğun formada Region Liqasına buraxaq. Şükürlər olsun ki, AFFA və PFL rəhbərliyi də bu ideyanı müsbət qarşıladı, müəyyən məsələlərdə köməyini əsirgəmədi. Nəticəsi isə bu oldu ki, klubumuz Region Liqasına qatılacaq. Heç şübhəsiz, bu ideyanın təşəbbüskarı kimi bilirdik ki, cəmiyyətdə maraqla qarşılanacaq. Ona görə də məsələyə ciddi və hərtərəfli yanaşırıq. “Xankəndi” Xankəndi şəhərini təmsil edəcək və bu mübarək faktın bizim çiyinlərimizə yüklədiyi məsuliyyəti, cavabdehliyi dərk edirik. Çünki Xankəndini, Qarabağımızı işğaldan azad edib bizə qaytarmış şəhidlərimizin, qazilərimizin, onminlərlə oğlumuzun haqqı heç nə ilə ödənə bilməz. “Xankəndi”ni təsis etməkdə əsas məqsədimiz böyük futbolu bu şəhərə qaytarmaqdı. İstəyirik futbolun kütləviləşməsində və populyarlaşmasında bu komandanın rolu olsun. Daha sonra isə Region Liqasında çempionluğa oynayan güclu bir kollektiv qurmağı planlaşdırırıq, bu istiqamətdə işlər gedir. Region Liqasında çempion olub növbəti il 2-ci liqaya vəsiqə qazanmaq əsas hədəfimiz olacaq. Heyəti tam istədiyimiz kimi komplektləşdirmək üçün yoxlama oyunları keçiririk, mütəxəssislərimiz seleksiya işi aparırlar. Klubumuz yenicə yarandığına və hələ formalaşma ərəfəsində olduğuna görə çox şey barədə təfərrüata varmaq istəmirəm. Xankəndi adının böyüklüyü bizə tələsməməyi təlqin edir. Klubun maliyyələşdirilməsi tam özəl imkanlar hesabına həyata keçirilir, gələcəkdə sponsorluq və tərəfdaşlıq müqavilələrinin bağlanması da nəzərdə tutulub. Ev oyunlarımız hələlik Şamaxıda keçiriləcək, lakin gələcəkdə mümkün olarsa, Xankəndi şəhərindəki mərkəzi stadiondan ev oyunları üçün istifadə etməyi düşünürük. Tam peşəkar kluba çevrilməsini planlaşdırdığımız “Xankəndi”ni bir gün Azərbaycan premyer-liqasında görmək isə ən böyük arzumuz və iddiamızdı. Bu, mütləq olacaq. Buna həm ciddi dəstək, ciddi resurslar, həm də zaman lazımdı. Biz ilk addımı atdıq, inanırıq ki, növbəti mərhələlərdə qarşıya qoyduğumuz hədəflərə tək-tək nail olduqca sizlə daha fərqli mövzularda söhbətlərimiz olacaq”.