Mübahisəli anın görüntüsü nə PFL-də, nə də “CBC Sport”da var – “Kor nöqtə”dən heç kim “sığortalanmayıb”
6-cı turun son matçı sosial şəbəkələri bir-birinə qatdı. “Turan Tovuz”un futbolçusu Roderik 90+4-cü dəqiqəsdə rəqib qapısına 3-cü topu göndərsə də, tovuzlular qələbə sevinci yaşaya bilmədi.
Qeydə alınmayan qolun təkrarı “CBC Sport” tərəfindən efirə verilmədi. Bu üzdən yayınçı şirkət də iradla üzləşdi. Ki, niyə qapı xəttinin yanında əlavə kamera quraşdırılmır? Görəsən, mübahisəli anın əlavə görüntüsü “CBC Sport”da və ya PFL-də varmı?
Əvvəlcə PFL-in media və marketinq direktoru Sənan Abdullayevə müraciət etdik. O, “Football-plus.az”a açıqlamasında bu sözləri dedi:
“Biz premyer-liqa matçlarına tək kamera göndəririk. O da “CBC Sport”un çəkilişinin əksinə olan istiqamətdən çəkir. Yalnız mərkəzdə dayanır, bir kamera olur. Ona görə də qapı xəttini çəkməsi mümkün deyildi”.
“CBC Sport”un baş redaktoru Şəmsəddin Abbasovun açıqlaması:
“Bizdə bu mövsümdən etibarən kameralarin sayı artırılıb. Hər oyunda ən azı 8-dən 12-yə qədər kamera var. Amma futbol dinamik oyundu. İstənilən halda, hətta böyük çempionatlarda və böyük yarışlarda (Çempionlar Liqası) kameralarının sayının 30-40-ı keçməsinə baxmayaraq, “kor nöqtə”dən heç kim “sığortalanmayıb”. Eyni vəziyyət bizdə həmin oyunda yaşandı. Tək biz yox, klub, AFFA və PFL rəsmiləri müsahibələrində bildirirlər ki, yayın keyfiyyəti bu mövsümdən etibarən artıb. Bu istiqamətdə işlərimiz davam edir. Amma yenə də futbol elə idman növüdü ki, heç bir halda özümüzü tam “sığortalaya” bilmərik. Bəzi hallarda belə vəziyyətlər yaşana bilər”.
RÖYANƏ OĞUZ
Digər xəbərlər
