Gələn ay kişi basketbolçular arasında yeni mövsüm start götürəcək.

Yeni mövsümdən mübarizəyə MOİK və "Lənkəran" da qoşulacaq, "Cəlilabad"ı isə "Quba" əvəzləyəcək. İlk oyunların oktyabrın 18-də keçirilməsi planlaşdırılır. Bu arada bütün klublar heyətini yeniləməklə məşğuldu.

Ötən mövsümün autsayderlərindən "Şəki" transfer bazarında çox fəaldı. Bölgə təmsilçisi son günlərdə heyətinə iki amerikalı, bir yerli basketbolçu qatıb. Bunlardan biri 24 yaşlı hücumçu Karl Consdu. Sentyabrın 26-da 28 yaşını tamamlayacaq Kris Barton isə Belçika, Finlandiya və Lüksembuqda legioner həyatı yaşayıb. "Şəki" həmçinin ölkəmizin U-20 yığmasının üzvü Əbdülmətin Quliyevlə güclənib. Ötən mövsümü "Cəlilabad"ın heyətində keçirən 20 yaşlı başketbolçu "Şəki"də də 17 nömrəli forma altında çıxış edəcək. “İpəkçilər”in daha əvvəl baş məşqçi postuna türkiyəli Bedri Meriç gətirdiyin, millimizin türkəsilli oyunçusu Ərcan Donatı transfer etdiyini də xatırladaq.

Yeni mövsümə hazırlığı davam etdirən “Sərhədçi” heyətinə üç basketbolçu qatıb. Bunlar amerikalılar Marlon Teylor, Dre Cekson və Matkeyl Lottsdu. Hər biri ilə mövsümün sonuna qədər müqavilə imzalanıb.

"Gəncə" basketbolçusu Maqsud Rüstəmovla müqaviləni yeniləyib. Ötən mövsümdən "sarı-göylər"in şərəfini qoruyan 22 yaşlı basketbolçu ilə birillik müqavilə imzalanıb. 197 sm boya malik Məqsəd hücumçudu, 14 nömrəli forma ilə oynayacaq.
Yeni mövsümdən paytaxtı təmsil edəcək NTD beş oyunçu ilə yollarını ayırıb. Klub müqavilə müddəti bitən Rəşid Abbasov, Qriffin Remmi, Eysan Vayli, Cared Smоll və Daniel Vestbruk ilə vidalaşıb.