Yığmamızın da yer aldığı qrupda srağagün iki oyun keçirildi.

“Football-plus.az” xəbər verir ki, bu oyunlardan çıxan əsas qənaət nədi? Artıq İsveçin qitə çempionatına vəsiqə uğrunda mübarizədən çəkildiyin deyə bilərik. Brüsseldə darmadağın olan Estoniya da topların fərqinə görə sonuncu pilləyə yuvarlandı. İndi Azərbaycan yığması üçün maraqlı perspektiv açılıb: növbəti oyunlarda uğurlu çıxış etməklə hətta İsveçi də geridə qoya bilərik. Təbii ki, İordaniya ilə yoxlama oyununu izləyən hər kəs belə nikbinliyə görə bizi qınayacaq. Amma biz yalnız nəzəriyyədən, ehtimaldan danışırıq. Yığmamızla bağlı xoş ehtimallar irəli sürmək isə günah deyil.

Avstriya İsveçlə səfər oyununda inamlı qələbə qazandı. Baxmayaraq ki, ilk yarı qarşılıqlı hücumlar şəraitində keçdi. Tədricən təşəbbüsü ələ alan Yanne Andersonun komandasının rəqibə cari seçmə mərhələdə ilk məğlubiyyəti yaşadacağını düşünənlər də var idi. Meydan sahibləri 30-cu dəqiqənin tamamında qola çox yaxın oldu. Ancaq Kulesvskinin uzaq dirək önünə asması zamanı İsak topa dəqiq zərbə vura bilmədi. Bundan sonra avstriyalılar bir qədər ehtiyatlı davranmağa başladı. Axı mümkün heç-heçə də İsveçlə 4 xal fərqini qorumağa və lider Belçikanın yanında qərarlaşmağa imkan verəcəkdi. Bununla belə, ardıcıl 3-cü dəfə AÇ-yə yollanmaq istəyən Avstriyanın fasilədən sonra işləri yağ kimi getdi. 53-cü dəqiqədə Qreqoriç balıq kimi tullanaraq hesabı açdı. Ardından Arnautoviç fərqi artırdı. Bu qolda dolayısıyla günahı olan müdafiəçi Hin bir qədər sonra penaltiyə də səbəbkar oldu. İsveçin qalan 21 dəqiqə ərzində üç top fərqini aradan qaldırması mümkünsüz idi. Meydan sahibləri yalnız sonda fərqi azaltmağı bacardı – Holm qapının sol küncünə bilyard zərbəsi vurdu. Belçika ilə Avstriyadan artıq 7 xal geri qalan İsveç başqa turnirlərə hazırlaşa bilər. Yeri gəlmişkən, Avstriya məğlubiyyətsiz oyunlar seriyasını 8-ə çatdırdı.

Qrupun digər oyunu gözlənilən hesabla da bitdi. Düzdü, Portuqaliya – Lüksemburq oyunundakı hesab qeydə alınmadı, ancaq Belçika Estoniyadan çox üstün idi ki, bu da 5 cavabsız qolda əksini tapdı. Görünür, “qırmızı iblislər” yığmamızla oyunun ardından üzləşdiyi tənqiddən dərs çıxarmışdı. Qələbənin əsas memarı məhsuldar ötürmə verən və dubl edən Lukaku oldu. Meydan sahiblərinin heyətində Karrasko da seçilirdi. Onun bir neçə müdafiəçini arxada qoyandan sonra vurduğu qolu təkrar-təkrar izləməyə dəyər. Qonaqlar zaman-zaman nəsə göstərməyə çalışsa da, status fərqi aşkar görünürdü. Bu qələbə Belçikanı zirvədə saxladı. Ancaq qrup liderliyinin sonda kimə qismət olacağı, çox güman, oktyabrın 13-də keçiriləcək Avstriya – Belçika oyununda bilinəcək. Estonlar isə bizimkilər kimi seçmə mərhələni yola verir. Estoniya – Azərbaycan rəqabətində kimin önə çıxacağı da oktyabrın 13-də keçiriləcək oyunda məlum olacaq. Xatırladaq ki, yığmamız iyundakı ev oyununda bu rəqiblə heç-heçə edib (1:1).

F qrupu
İsveç – Avstriya 1:3 (0:0)
İsveç: Olsen, Valkvist (Holm, 75), Lindelöf, Hin, Kulusevski, Sema, Forsberq (Karlsson, 64), Ekdal (Qustafsson, 64), Kayuste (Klasson, 75), Dyekereş, İsak (Kvayson, 83).
Avstriya: Şlager, Poş, Alaba, Linhart, Mvene (Veber, 72), Laymer (Zaydl, 87), Zabitser, Şlager (Qrilliç, 87), Zayvald, Arnautoviç (Vimmer, 72), Qreqoriç (Onisivo, 84).
Qollar: Qreqoriç, 53 (0:1). Arnautoviç, 56 (0:2). Arnautoviç, 69-p. (0:3). Holm, 90 (1:3).
Vərəqələr: Mvene, 45. Karlsson, 71 – sarı.
Hakim: Sərdar Gözüböyük (Niderland).
12 sentyabr. Solna. 43228 tamaşaçı.
Belçika - Estoniya 5:0 (2:0)
Belçika: Kastels, Teate, Vertongen (Debast, 84), Fas, Kastan (Sike, 66), Karrasko (Lukebakio, 59), Onana, Manqalya, Dokyu, Trossar (De Ketelare, 66), Lukaku (Openda, 59).
Estoniya: Heyn, Mets, Tamm, Baranov, Pikk, Poom (Şeyn, 46), Kyyat (Miller, 76), Paskoçi, Oyamaa (Sinyavski, 61), Vasilyev (Tunev, 61), Anyer (Zenyov, 67).
Qollar: Vertongen, 4 (1:0). Trossar, 18 (2:0). Lukaku, 56 (3:0). Lukaku, 58 (4:0). De Ketelare, 88 (5:0).
Vərəqələr: Mets, 41. De Ketelare, 70 – sarı.
Hakim: Bartoş Frankovski (Polşa).
12 sentyabr. Brüssel. 24127 tamaşaçı.
1. Belçika 5 4 1 0 13-1 13
2. Avstriya 5 4 1 0 12-4 13
3. İsveç 5 2 0 3 11-8 6
4. Azərbaycan 4 0 1 3 2-11 1
5. Estoniya 5 0 1 4 2-16 1
13 oktyabr: Estoniya – Azərbaycan, Avstriya – Belçika.

Faktlar
* Səfərdə olduğu kimi, evdə də Estoniyanın qapısına iki dəfə yol tapan Lukaku 8 qolla seçmə mərhələnin bombardiridi. Onun ən yaxın izləyiciləri Maktomineylə Höylunn hərəyə 6 dəfə fərqlənib.
* Milli formada keçirdiyi 110-cu oyunda qol sayını 77-yə çatdıran Lukaku Belçika yığmasının tarixinin bombardiridi. “Roma”nın 30 yaşlı hücumçusu Avropa yığmalarının bombardirləri arasında yalnız üç futbolçudan geri qalır. Bunlar Robert Levandovski (Polşa, 144 oyunda 81 qol), Ferents Puşkaş (Macarıstan və İspaniya, 89 oyunda 84 qol) və Kriştiano Ronaldodu (Portuqaliya, 201 oyunda 123 qol)