"Həmin epizod çox böyüdüldü. Mən yığmada çalışanda penalti vuranlar sıra ilə Emin, Ramil və Toral idi. Bəzən özünü daha yaxşı hiss edən futbolçu penalti vurmaq istəyir. Həmin anda da bu hal yaşandı. Sadəcə, Emin böyüklük etdi. O, hansısa insident yaşanmasın deyə topu Ramilə verdi. Şeydayev qol vursaydı, indi hamı başqa cür danışardı. Belə hallar olur. Bunu "şişirdib" oyunçuların Slovakiya ilə matçda cəzalandırıldığını demək doğru deyil. Düşünürəm ki, hadisə Eminin karyerasına təsir etməyəcək. Bir məsələyə görə onu silib-atmaq düzgün deyil. Mövzuya belə yanaşmamalıydıq. Eminlə Ramilin əvəzinə meydana çıxanların hələ "yetişmədiyini" gördük. Deməli, təcrübəli futbolçularımızı qorumalıyıq. Yenə də Fernando Santuşun qərarlarına hörmətlə yanaşıram. Onun işinə kimsə qarışmamalıdı. Amma Eminlə Ramil məhz penalti epizoduna görə start heyətində deyildisə, bu, haqsızlıqdı. Eminin millimizə qazandırdığını uğurları yaddan çıxarmamalıyıq. Qurban Qurbanovla eyni sayda qol vurub. Bunlar şəxsi fikrimdi, Santuşun düz və ya səhv etdiyini deyə bilmərəm. Görünən odu ki, baş məşqçiyə zaman lazımdı. O, hələ oyunçuları yaxşı tanımır. Bu da normaldı. Millidə futbolçularla ünsiyyət az olur. Məsələyə mental baxımdan xüsusi yanaşmalıyıq ki, ümumi işin xeyrinə olsun. Hadisələri fərdi şəkildə dəyərləndirmək olmaz. İsveçə Ramil Şeydayevə, Slovakiyaya Amin Seydiyevə görə uduzduğumuzu desək, doğru olmayacaq".