"Ev oyununu rəqiblərin meydanında keçirmək istəmədik"
Sentyabrın 11-də 1-ci liqada yeni mövsümə start veriləcək.
Çempionatın ilk turunun cədvəli bəllidi. Maraqlıdı ki, "İmişli"nin sentyabrın 12-də "Baku Sportinq"i qəbul edəcəyi matç Tovuzda keçiriləcək. Buna İmişli şəhər stadionunda görülən təmir-bərpa işlərinin səbəb olduğunu bilirik. Lakin İmişli ilə Tovuz arasındakı məsafə futbolçular üçün məqsədəuyğun sayılmır. Azarkeş marağı da öz yerində. Bu üzdən Yevlax, Saatlı, Şamaxı və Qəbələ kimi alternativlər olduğu halda, Tovuz seçiminin səbəbi maraq doğurdu.
Bu haqda detallı bilgi almaq məqsədilə "İmişli"nin icraçı direktoru Aqşin Mürsəlova müraciət etdik. Onun "Football-plus.az"a dedikləri:
"Ev oyununu rəqiblərin meydanında keçirmək istəmədik. Qərar məhz bununla bağlıdı. Belədə Şamaxı və Tovuzdakı stadion variantları daha uyğun idi. "Şamaxı" ilə müəyyən səbəblərə görə ortaq məxrəcə gələ bilmədik. "Turan Tovuz"la isə dostluq münasibətlərimiz var. Sağ olsunlar, müraciətimizi müsbət cavabladılar. Futbolçuların ən yaxşı formada meydana çıxması üçün əlimizdən gələni edəcəyik. Tovuzda bizi dəstəkləyən azarkeşlərin sayı az deyil. Ümumiyyətlə, bu bölgənin əhalisindən həmişə dəstək görmüşük. İnanırıq ki, orda yaşayanlar bizi tək qoymayacaq. Tovuz da evimiz sayılır".
Aqşin bəy İmişli şəhər stadionunun son durumundan da bəhs etdi:
"İşlər böyük ölçüdə bitib. Təbii ot örtüyünün iki dəfə biçilməsi lazımdı ki, daha keyfiyyətli olsun. Çox güman, cəmi bir ev oyununu başqa bölgədə keçirəcəyik".
KƏNAN BAHADIR
Digər xəbərlər
